mآزادکشمیر کی موجودہ سیاسی صورتحال، پہلا استعفیٰ آگیا

چیئرمین آزاد جموں و کشمیر بورڈ آف انوسٹمنٹ سردار امجد جلیل نے استعفیٰ دے دیا، اپنا استعفیٰ وزیراعظم چوہدری انوار الحق کو بھجوا دیا + آزاد کشمیر ایک پرامن خطہ تھا یہاں خون کی ہولی کھیلی جارہی ہے وزیر اعظم آزاد کشمیر نے عوام اور پولیس کو آمنے سامنے لا کھڑا کردیا، سردار امجد جلیل

اتوار 12 مئی 2024 20:40

غ* مظفر آباد(اُردو پوائنٹ اخبارتازہ ترین - آن لائن۔ 12 مئی2024ء) آزادکشمیر کی موجودہ سیاسی صورتحال، پہلا استعفیٰ آگیا،چیئرمین آزاد جموں و کشمیر بورڈ آف انوسٹمنٹ سردار امجد جلیل نے استعفیٰ دے دیا، اپنا استعفیٰ وزیراعظم چوہدری انوار الحق کو بھجوا دیا۔ استعفیٰ کے حوالے سے گفتگوکرتے ہوئے سردار امجد جلیل نے کہا کہ آزاد کشمیر کی موجودہ سیاسی صورتحال پر مجھے بہت دکھ اور افسوس ہورہا ہے گزشتہ ایک سال سے آزاد کشمیر جوائنٹ ایکشن کمیٹی کے ساتھ فٹ بال کھیلا جارہا تھا موجودہ صورتحال کی ذمہ داری وزیراعظم آزاد کشمیر اور انکی کابینہ پر عائد ہوتی ہے وزیر اعظم آزاد کشمیر کی ہٹ دھرمی اور انکی کابینہ کی عدم دلچسپی کے باعث یہ حالات پیدا ہوئے۔

انہوں نے کہا کہ آزاد کشمیر ایک پرامن خطہ تھا یہاں خون کی ہولی کھیلی جارہی ہے وزیر اعظم آزاد کشمیر نے عوام اور پولیس کو آمنے سامنے لا کھڑا کردیا جوائنٹ ایکشن کمیٹی سے اپیل کرتا ہوں کہ پرامن احتجاج کریں۔

(جاری ہے)

انہوں نے کہا کہ آزاد کشمیر کے غریب لوگ بجلی اور آٹے کیلئے احتجاج کررہے ہیں آزاد کشمیر حکومت کا کام بنتا ہے کہ عوام کو ریلیف دے اپنے ذاتی خرچے پر غیرملکی سرمایہ کاروں کو آزاد کشمیر میں سرمایہ کاری کیلئے قائل کیا وزیر اعظم آزاد کشمیر کی عدم دلچسپی، ضد اور عناد کے باعث اپنے خواب کو پورا نہیں کرسکا۔