ْ طیب اردگان کا نسلی تعصب کی وجہ سے جرمن فٹبال ٹیم چھوڑنے والے میسوٹ اوزل سے اظہار یکجہتی

انقرہ(اُردو پوائنٹ اخبارتازہ ترین - آئی این پی۔ 25 جولائی2018ء) ترک صدر طیب اردگان نے میسوٹ اوزل کے جرمن فٹبال ٹیم چھوڑنے کے فیصلے کو سراہا ہے۔طیب اردگان نے ملکی میڈیا سے گفتگو میں کہا کہ میں نے ترک نژاد فٹبال اسٹار اوزل سے اس فیصلے کے سامنے آنے کے بعد فون پر بات کی، انھوں نے نسلی تعصب کی بنیاد پر جرمن فٹبال ٹیم کی نمائندگی جاری رکھنے سے انکار کیا۔

ان کا یہ رویہ بالکل حب الوطنی کا عکاس ہے، جرمن ٹیم کی فتوحات کیلیے پسینہ بہانے والے نوجوان پلیئرز کیلیے اس طرح کا متعصبانہ رویہ کیونکر قابل قبول ہوسکتا ہے، اسے قطعی برداشت نہیں کیا جاسکتا تھا۔اوزل کے چار صفحات پر مشتمل بیان سے جرمنی میں تہلکہ مچا ہوا ہے جبکہ ترک وزیروں کی جانب سے اس کی ستائش کی جارہی ہے، اوزل کو ورلڈ کپ کے دوران مئی میں طیب اردگان کے ہمراہ بنائی گئی تصویر کی وجہ سے ہدف تنقید بنایا گیا تھا۔

(جاری ہے)

اوزل 2014 کی ورلڈ چیمپئن جرمن اسکواڈ کے اہم ممبر رہے تھے، تاہم اس بار روس میں منعقدہ ورلڈ کپ کے دوران اردگان کے ہمراہ تصویر کو لیکر جرمن فٹبال ایسوسی ایشن ( ڈی ایف بی ) حکام، اسپانسرز اور میڈیا بھی اوزل پر تنقید کرتا رہا تھا،اوزل نے اپنے فیصلے میں لکھا تھا کہ گرینڈل اور ان کے حامیوں کی نظروں میں جب ہم جیتتے ہیں تو جرمن ہوتے ہیں لیکن جب ہم ہارگئے تو مجھے امیگرنٹ گردانا گیا۔دوسری جانب ترک وزیر انصاف عبداللہ حامت گل نے اوزل کو مبارکباد پیش کرتے ہوئے کہا تھا کہا انھوں نے فاشزم کے وائرس کیخلاف بہت خوبصورت گول کیا ہے۔دوسری جانب جرمن کوچ جوکیم لیو نے اوزل کی ریٹائرمنٹ کے فیصلے پر حیرت کا اظہار کیا ہے۔