محمد حسنین پر ’بال تھرو‘ کرنیکا الزام لگانیوالے مارکس سٹوئنس سزا سے بچ نکلے

لاہور (اردو پوائنٹ تازہ ترین اخبار ۔ 16 اگست 2022ء ) دی ہنڈریڈ میں ایک میچ کے دوران محمد حسنین کے باؤلنگ ایکشن پر سوال اٹھانے کے بعد سے آسٹریلوی کرکٹر مارکس سٹوئنس شدید تنقید کی زد میں ہیں تاہم اس پر انگلش کرکٹ بورڈ کے تادیبی ضابطہ کی خلاف ورزی کا باقاعدہ الزام نہیں لگایا جائے گا۔ مارکس اور حسنین کی ملاقات سدرن بریو اور اوول انوینسیبلز کے درمیان کھیلے گئے میچ میں ہوئی جہاں آسٹریلوی بلے باز حسنین کی گیند پر پل شاٹ صحیح طریقے سے کھیلنے میں ناکام رہے اور انگلینڈ کے ول جیکس نے ان کا کیچ لے لیا۔

پویلین واپس جاتے ہوئے دائیں ہاتھ کے بلے باز نے دعویٰ کیا کہ اس کی اننگز کو ختم کرنے والی ڈیلیوری غیر قانونی تھی اور انہوں نے حسنین کے ایکشن کرتے ہوئے ان پر ’بال تھرو‘ کرنے کا الزام لگایا جس نے سوشل میڈیا پر غم و غصے کو جنم دیا۔

(جاری ہے)

بعد میں میڈیا نے رپورٹ کیا کہ میچ ریفری ڈین کوسکر نے اس واقعے کے بارے میں آسٹریلوی کرکٹر کے ساتھ ایک مختصر بات چیت کی ہے اور یہ کہ ان پر ای سی بی کے تادیبی ضابطہ کی خلاف ورزی کا باقاعدہ الزام عائد نہیں کیا جائے گا۔

انٹرنیشنل کرکٹ کونسل نے پاکستان کے نوجوان فاسٹ بولر پر بگ بیش لیگ میں ایڈیلیڈ سٹرائیکرز اور سڈنی سکسرز کے درمیان میچ کے دوران ایکشن غیر قانونی پائے جانے پر پابندی عائد کر دی تھی۔ نوجوان باؤلر نے اپنے ایکشن کو بہتر بنانے کے لیے سخت محنت کی، ان کا لاہور یونیورسٹی آف مینجمنٹ سائنسز (LUMS) میں ICC سے منظور شدہ بائیو مکینکس لیبارٹری میں ٹیسٹ کیا گیا اور اسے قانونی پایا گیا۔ حسنین اس وقت جاری دی ہنڈریڈ میں اوول انوینسیبلز کی نمائندگی کر رہے ہیں، جہاں انہوں نے تین میچوں میں 1.93 رنز فی گیند کے اکانومی ریٹ کے ساتھ تین وکٹیں حاصل کیں۔