ٹی ٹونٹی ورلڈ کپ فائنل سے قبل ہی میلبورن میں بارش شروع

میلبورن (اردو پوائنٹ تازہ ترین اخبار ۔ 11 نومبر 2022ء ) ٹی ٹونٹی ورلڈ کپ فائنل سے پہلے ہی میلبرن میں بارش شروع ہو گئی، پاکستان ٹیم آج کا ٹریننگ سیشن انڈور میں کرے گی۔ اس سے قبل ہی آسٹریلیا کے محکمہ موسمیات کی جانب سے ٹی ٹونٹی ورلڈ کپ 2022ء کا فائنل بارش سے متاثر ہونے کا خدشہ ظاہر کر دیا گیا تھا۔ آسٹریلوی محکمہ موسمیات کے مطابق اتوار کو فائنل کے موقع پر بارش کا 95 فیصد امکان ہے جب کہ پیر کو بھی بارش کے 95 فیصد امکانات کی پیش گوئی کی گئی ہے۔

(جاری ہے)

ورلڈ کپ کے ٹورنامنٹ قوانین کے مطابق اگر فائنل یا سیمی فائنل بارش سے متاثر ہوئے تو مقابلہ ریزرو ڈے پر جاری رہے گا۔ ٹورنامنٹ قوانین کے مطابق میچ مکمل تصور کرنے کیلئے اننگز میں کم از کم دس، دس اوورز کا کھیل لازمی ہے، بارش کی صورت میں میچ ریزرو ڈے پر وہیں سے شروع ہوگا جہاں سے وہ رکا تھا۔ اگر بارش کی وجہ سے بالکل بھی کھیل ممکن نہ ہوا تو پھر دونوں فائنلسٹ ٹیموں کو مشترکہ فاتح قرار دے دیا جائے گا۔