ورلڈ کپ اور اولمپک گیمز سمیت کھیلوں کے بڑے مقابلوں پر دہشتگرد ڈرون حملوں کا خدشہ

دوحا (اردو پوائنٹ تازہ ترین اخبار ۔ 21 نومبر 2022ء ) ورلڈ کپ اور اولمپک گیمز جیسے کھیلوں کے بڑے مقابلوں کے موقع پر ڈرون سے دہشت گرد حملے حقیقی خطرہ ہیں۔ یہ بات فرانسیسی وزیر داخلہ نے دوحہ ،قطر سے اے ایف پی سے ٹیلی فون پر گفتگو کرتے ہوئے کہی۔ جیرالڈ ڈرمانن کے مطابق سپورٹس ایونٹس کے دوران دہشت گرد ڈرون حملے دور جدید کا نمایاں خطرہ ہیں۔ ایسے مواقع پر کھیلوں کے بڑے مقابلوں کی افتتاحی تقاریب کو خصوصاً نشانہ بنائے جانے کا امکان ہوتا ہے۔

(جاری ہے)

انہوں نے کہا کہ فرانس سے 225 سکیورٹی اہلکار بھی قطر میں ورلڈ فٹ بال کپ کے موقع پر موجود ہوں گے جنہیں فرانس میں آئندہ رگبی ورلڈ کپ کے انتظامات کے لئے قیمتی تجربہ حاصل ہوگا۔ 2024ء اولمپک گیمز بھی فرانس میں ہونے والے ہیں۔ انہوں نے خبردار کیا کہ قطر ورلڈ کپ کو سیاست سے علیحدہ رکھنا ہوگا۔