سعید اجمل بھی پاکستانی ٹیم کی کوچنگ کے خواہشمندوں میں شامل

لاہور (اردو پوائنٹ تازہ ترین اخبار ۔ 20 جنوری 2023ء ) سابق ٹیسٹ کرکٹر سعید اجمل بھی پاکستانی ٹیم کی کوچنگ کے خواہمشندوں میں شامل ہوگئے۔ ویب سائٹ ’کرکٹ پاکستان‘ سے خصوصی گفتگو کرتے ہوئے سعید اجمل نے کہا کہ اسلام آباد یونائٹیڈ کے ساتھ کام کرکے بہت تجربہ حاصل کرچکا ہوں، اگر پاکستانی ٹیم کے ساتھ بطور کوچ کام کرنے کا موقع ملا تو ضرور اس میں بہتری لانے کی کوشش کروں گا۔

غیر ملکی کوچز کو جتنے پیسے دیے جاتے ہیں، اس سے کم معاوضہ بھی پاکستانی کوچز کو ملے تو وہ بھی ٹیم کو بلندیوں پر پہنچا سکتے ہیں۔ شہرہ آفاق آف سپنر نے ملک میں کوالٹی سپنرز نہ ہونے کو لمحہ فکریہ قرار دیا۔ ان کا کہنا ہے کہ ماضی میں سپن بولنگ کے شعبے نے پاکستانی ٹیم کی کامیابیوں میں اہم کردار ادا کیا، اب ایسا کچھ دکھائی نہیں دے رہا۔

(جاری ہے)

ان کا کہنا تھا کہ ٹیسٹ کرکٹ میں پاکستانی ٹیم کی پرفارمنس دیکھ کر بہت مایوسی ہوئی، جب تک اچھے سپنرز نہیں ہوں گے تب تک توقعات کے مطابق نتائج نہیں ملیں گے۔

انہوں نے کہا کہ جو ہمارے پاس سپنرز ہیں، ان پر ابھی بہت کام کرنے کی ضرورت ہے، نوجوان سپنر ابرار احمد کو بھی بولنگ کرتے ہوئے دیکھا ہے، پی ایس ایل میچز کے دوران ان کے ساتھ خود کام کروں گا تاکہ ان کی بولنگ میں مزید کاٹ لائی جا سکے۔ سعید اجمل نے کہا کہ پاکستانی پچز پر تنقید درست نہیں، ایک اچھا سپنر وہی ہوتا ہے جو ہر طرح کی پچز پر ٹرن کروا سکے۔ ٹیسٹ میچز میں فاسٹ بولرز کی کارکردگی بھی تسلی بخش دکھائی نہیں دی، ٹیسٹ کرکٹ میں بہتری کے لیے اقدامات کی ضرورت ہے۔ دوسرا کے موجد جادوگر اسپنر نے کہا کہ کپتان کی تبدیلی مسائل کا حل نہیں، بابر اعظم کو سمجھانے کی ضرورت ہے۔