اسرائیلی حملوں کے شکار فلسطینی عوام کیلئے شاہین آفریدی کا اظہارِ ہمدردی کا خصوصی پیغام

لاہور (اردو پوائنٹ تازہ ترین اخبار ۔ 8 اپریل 2023ء ) اسرائیلی افواج کی جانب سے فلسطینی عوام پر تشدد کے بعد پاکستان ٹیسٹ کرکٹ ٹیم کے فاسٹ بولر شاہین شاہ آفریدی نے اظہارِ ہمدردی کا پیغام جاری کردیا۔ شاہین شاہ آفریدی نے اس حوالے سے سوشل میڈیا پر بہت ہی معنی خیز اور خوبصورت انداز میں اپنے جذبات کی ترجمانی کی۔ شاہین شاہ آفریدی نے لکھا کہ’مومن ایک جسم کی طرح ہوتے ہیں، اگر جسم کا کوئی حصہ ٹھیک نہیں ہو تو پھر سارا جسم اس تکلیف کو محسوس کرتا ہے، ہم بار بار مسجدِ اقصیٰ میں ہونے والے ظلم کو محسوس کر سکتے ہیں‘۔

(جاری ہے)

انہوں نے لکھا کہ اللّٰہ تعالیٰ فلسطینی عوام کی مشکلات آسان فرمائے، آمین‘۔ یاد رہے کہ گزشتہ روز فلسطینی شہر غزہ میں کئی دھماکے سنے گئے تھے اور اسرائیلی فوج نے غزہ کی پٹی پر حملے کی تصدیق کی تھی۔ اس سے قبل 5 اپریل کو اسرائیلی فورسز نے مسجد اقصٰی پر حملہ کر دیا تھا جس کے نتیجے میں 12 فلسطینی زخمی ہوگئے تھے جب کہ اسرائیلی پولیس نے 350 سے زائد فلسطینیوں کو حراست میں لے لیا تھا۔