پرتھ ٹیسٹ، سرفراز احمد نے وارنر کا سٹمپنگ چانس مس کردیا

پرتھ (اردو پوائنٹ تازہ ترین اخبار ۔ 14 دسمبر 2023ء ) پرتھ ٹیسٹ میچ کے پہلے روز پاکستانی فیلڈرز نے آسٹریلوی اوپنرز کے دو کیچز ڈراپ کردیئے، وکٹ کیپر سرفراز احمد نے ڈیوڈ وارنر کو سٹمپ آئوٹ کرنے کا چانس مس کردیا۔ پرتھ کرکٹ گراؤنڈ میں کھیلے جارہے سیریز کے پہلے ٹیسٹ میچ کے پہلے روز اوپنر ڈیوڈ وارنر نے جارحانہ کھیل کا مظاہرہ کیا اور عثمان خواجہ کے ہمراہ پہلی وکٹ کی شراکت میں 126 رنز بنائے تاہم خواجہ 41 رنز بناکر پویلین لوٹے جبکہ ڈیوڈ وارنر 149 رنز بناکر کریز پر موجود ہیں۔

ٹیسٹ میچ کے پہلے روز پاکستانی فیلڈرز نے کیچز چھوڑنے کے سلسلے کو برقرار رکھا، عثمان خواجہ کا کیچ عبداللہ شفیق نے 21 کے انفراد اسکور پر ڈراپ کیا جبکہ 104 کے انفرادی اسکور پر ڈیوڈ وارنر کا کیچ خرم شہزاد نے مڈ آن پر ڈراپ کیا۔

(جاری ہے)

وارنر جب 141 رنز پر کھیل رہے تھے تو سلمان علی آغا کی گیند پر سرفراز احمد نے ان کا سٹمپ آئوٹ مس کردیا۔ دوسری جانب آسٹریلوی ٹیم نے پہلے روز کھیل کے آخری سیشن میں اب تک 3 وکٹوں کے نقصان پر 288 رنز بنالیے ہیں۔ پاکستان کی جانب سے شاہین شاہ آفریدی، خرم شہزاد اور فہیم اشرف ایک ایک وکٹ حاصل کرنے میں کامیاب ہوسکے۔