تیسرے ٹی ٹونٹی کے لیے پاکستانی پلیئنگ الیون کا اعلان ، تین تبدیلیاں کردی گئیں

آکلینڈ (اردو پوائنٹ تازہ ترین اخبار ۔ 16 جنوری 2024ء ) پاکستان نے بدھ کو نیوزی لینڈ کے خلاف ڈیونیڈن میں ہونے والے تیسرے ٹی ٹونٹی کے لیے اپنی لائن اپ میں تین تبدیلیاں کی ہیں۔ پاکستان کی جانب سے منگل کو پلیئنگ الیون کا اعلان کیا گیا جس میں تین بڑی تبدیلیاں کی گئی ہیں، اسامہ میر، عامر جمال اور عباس آفریدی ٹیم سے باہر ہوگئے ہیں۔ ان تینوں کی جگہ قومی ٹیم میں وسیم جونیئر، محمد نواز اور زمان خان کو شامل کرلیا گیا ہے جو نیوزی لینڈ کے خلاف تیسرے ٹی ٹونٹی میں ایکشن میں نظر آئیں گے۔

پاکستانی پلیئنگ الیون محمد رضوان، صائم ایوب، بابر اعظم، فخر زمان، اعظم خان (وکٹ کیپر)، افتخار احمد، محمد نواز، شاہین آفریدی (کپتان)، ایم وسیم جونیئر، زمان خان، حارث رؤف پر مشتمل ہوگی۔

(جاری ہے)

واضح رہے کہ عباس آفریدی پیٹ کے مسل میں اسٹرین کی وجہ سے اس میچ سے باہر ہوئے ہیں۔ اس حوالے سے اسکین میں کسی قسم کی شدید انجری کی تشخیص نہیں ہوئی ہے، اگلے 2 میچوں میں ان کی دستیابی کے بارے میں بعد میں فیصلہ کیا جائے گا۔

یاد رہے کہ عباس آفریدی نے نیوزی لینڈ کے خلاف پہلے میچ میں 3 اور دوسرے میچ میں 2 وکٹیں حاصل کی تھیں۔