پاکستان کرکٹ ٹیم نے نیوزی لینڈ کے خلاف ٹی 20 سیریز کیلئے راولپنڈی میں پریکٹس کا آغاز کر دیا

راولپنڈی (اُردو پوائنٹ اخبارتازہ ترین - اے پی پی۔ 16 اپریل2024ء) پاکستان کرکٹ ٹیم نے نیوزی لینڈ کے خلاف ٹی 20 سیریز کے لیے راولپنڈی میں پریکٹس کا آغاز کر دیا۔ منگل کے روز قومی ٹیم کے کھلاڑیوں نے ہیڈ کوچ اظہر محمود کی نگرانی میں پنڈی سٹیڈیم میں پریکٹس سیشن میں حصہ لیا۔ پریکٹس سیشن کے دوران کھلاڑیوں نے بیٹنگ، باؤلنگ اور فیلڈنگ کی مشقیں کیں۔

(جاری ہے)

قومی ٹیم (کل) بدھ کو بھی پریکٹس سیشن میں حصہ لے گی۔ پاکستان اور نیوزی لینڈ کے درمیان پانچ ٹی 20 انٹرنیشنل میچوں پر مشتمل سیریز کا پہلا میچ 18 اپریل بروز جمعرات کو کھیلا جائے گا۔ دوسرا میچ 20 اپریل ، تیسرا میچ 21 اپریل ، چوتھا میچ 25 اپریل جبکہ پانچواں اور آخری میچ 27 اپریل کو کھیلا جائے گا۔ سیریز کے پہلے تین میچ راولپنڈی کرکٹ سٹیڈیم جبکہ آخری دو میچ قذافی سٹیڈیم لاہور میں کھیلے جائیں گے۔