احسان اللہ کے علاج میں غفلت، چیئرمین پی سی بی کا ذمہ دار افراد کیخلاف ایکشن کا اعلان

لاہور (اردو پوائنٹ تازہ ترین اخبار ۔ 28 اپریل 2024ء ) پاکستان کرکٹ بورڈ(پی سی بی) کے چیئرمین محسن نقوی نے کہا ہے کہ احسان اللہ کے حوالے سے پینل کی رپورٹ کا انتظار ہے، ابھی اس پر کمنٹ نہیں کروں گا جو بھی ذمے دار ہوگا ایکشن ہوگا۔ لاہور میں پریس کانفرنس کرتے ہوئے محسن نقوی نے کہا کہ احسان اللہ کے علاج کے حوالے سے شکایت ملی تھی، منگل، بدھ تک رپورٹ آجائے گی، ہمارے لئے سب کرکٹر اہم ہیں۔

(جاری ہے)

چیئرمین پی سی بی نے کہا کہ جیسن گلیسپی کو ریڈ بال کا کوچ لا رہے ہیں، جنوبی افریقا کے گیری کرسٹن وائٹ بال کے کوچ ہوں گے، دونوں دنیا کے بہترین کوچ ہیں، یہ وائٹ بال اور ریڈ بال کرکٹ ٹیموں کو جوڑیں گے، اظہر محمود ٹیم کو ایک جگہ پر لائے ہیں، اظہر محمود دونوں فارمیٹ کے اسسٹنٹ کوچ ہوں گے۔ چیئرمین پی سی بی نے کہا کہ ان کا آنا اس بات کا ثبوت ہے کہ انہیں ہمارے پوٹینشل پر اعتماد ہے، ہم بہتر کرنے میں کامیاب ہونگے۔