شاہین آفریدی ٹی ٹوٹی کرکٹ میں دوسرے کامیاب ترین ملکی فاسٹ بائولر بن گئے

لاہور (اردو پوائنٹ تازہ ترین اخبار ۔ 15 مئی 2024ء ) قومی ٹیم کے فاسٹ بائولر شاہین آفریدی اب T20I میں پاکستان کے لیے دوسرے سب سے زیادہ کامیاب تیز گیند باز ہیں۔ شاہین آفریدی نے ڈبلن میں تیسرے T20I میں آئرلینڈ کیخلاف 14 رنز کے عوض 3 وکٹیں لیں۔ شاہین آفریدی اب پاکستان کے لیے 64 ٹی ٹونٹی میچز میں 20.42 کی اوسط سے 88 وکٹیں حاصل کرچکے ہیں ۔ پاکستان کے لیے سب سے زیادہ ٹی ٹونٹی وکٹیں حاصل کرنیکا ریکارڈ حارث رئوف کے پاس ہے جنہوں نے اب تک 64 اننگز میں 90 وکٹیں حاصل کی ہیں ۔

عمر گل 60 اننگز میں 85 وکٹوں کے ساتھ اس فہرست میں تیسرے، محمد عامر 55 اننگز میں 63 وکٹیں لے کر چوتھے جبکہ حسن علی 49 اننگز میں 60 وکٹوں کے ساتھ پانچویں نمبر پر ہیں ۔ واضح رہے کہ شاہین آفریدی نے ڈبلن میں تیسرے T20I میں ایک نیا قومی ریکارڈ اپنے نام کیا۔

(جاری ہے)

وہ اپنے ٹی ٹونٹی کیریئر میں 13ویں بار تین یا اس سے زیادہ وکٹیں لینے والے پہلے باؤلر ہیں جو کہ کسی پاکستانی باؤلر کی طرف سے اننگز میں 3 یا زائد سب سے زیادہ وکٹیں ہیں۔

T20I میں پاکستان کے لیے اننگز میں زیادہ مرتبہ تین یا اس سے زیادہ وکٹیں لینے والے بائولرز میں عمر گل (12) دوسرے، شاداب خان (12) تیسرے ، سعید اجمل (11) چوتھے، محمد عامر (10) پانچویں جب کہ حارث رؤف (9) چھٹے نمبر پر ہیں۔ واضح رہے کہ پاکستان نے تیسرے ٹی ٹونٹی میں آئرلینڈ کو شکست دے کر تین میچوں پر مشتمل سیریز 1-2 سے اپنے نام کرلی۔ ڈبلن سٹیڈیم میں کھیلے گئے سیریز کے آخری اور فیصلہ کن میچ میں پاکستان نے آئرلینڈ کو 6 وکٹوں سے شکست دے دی، آئرلینڈ نے پاکستان کو جیت کیلئے 179 رنز کا ہدف دیا تھا جو پاکستان نے 17 اوورز میں 4 وکٹوں کے نقصان پر حاصل کرلیا۔

پاکستان کی جانب سے بابراعظم نے 75 اور محمد رضوان نے 56 رنز کی شاندار اننگز کھیلی، صائم ایوب 14 اور افتخار احمد 5 رنز بناسکے، اعظم خان 18 اور عماد وسیم 1 رن کے ساتھ ناٹ آؤٹ رہے۔ آئرلینڈ کی طرف سے مارک ایڈیئر نے 3 اور کرگ ینگ نے ایک وکٹ حاصل کی۔ قبل ازیں پاکستان نے ٹاس جیت کر بولنگ کا فیصلہ کیا تھا، آئرلینڈ نے پہلے بیٹنگ کرتے ہوئے مقررہ 20 اوورز میں سات وکٹوں کے نقصان پر 178 رنز بنائے۔

لورکن ٹکر نے 73 رنز کی شاندار اننگز کھیلی جبکہ اینڈی بیلبرین 35 رنز کے ساتھ نمایاں رہے۔ ہیری ٹیکٹر 30 اور گراہم ہوم 10 رنز کے ساتھ ناٹ آؤٹ رہے، اسکے علاوہ کوئی بھی آئرش بیٹر ڈبل فگرز میں داخل نہ ہوسکا۔ پاکستان کی طرف سے شاہین آفریدی نے 3، عباس آفریدی نے 2، محمد عامر اور عماد وسیم نے ایک، ایک وکٹ حاصل کی۔