ندا ڈار نے ویمنز ٹی ٹونٹی انٹرنیشنل کا اہم ریکارڈ اپنے نام کرلیا

لاہور (اردو پوائنٹ تازہ ترین اخبار ۔ 18 مئی 2024ء ) انگلینڈ ویمن کرکٹ ٹیم کے خلاف سیریز کے دوسرے میچ میں پاکستانی قومی ویمن کرکٹ ٹیم کی کپتان ندا ڈار نے بین الاقوامی ٹی ٹوئنٹی کرکٹ کا ایک اہم اعزاز اپنے نام کرلیا ہے۔ نارتھمپٹن میں کھیلے گئے میچ میں پاکستان کی کپتان ندا ڈار ویمنز ٹی ٹونٹی انٹرنیشنل میں سب سے زیادہ 137 وکٹیں حاصل کرنے والی بولر بن گئیں۔

(جاری ہے)

37 سالہ نے اپنی 141 ویں اننگز میں دو وکٹیں حاصل کیں اور آسٹریلیا کی میگن شٹ کو پیچھے چھوڑ دیا جن کے نام 136 وکٹیں ہیں۔ اس فہرست میں آسٹریلیا کی ایلیس پیری 126 وکٹوں کے ساتھ تیسرے، ویسٹ انڈیز کی انیسہ محمد 125 وکٹوں کے ساتھ چوتھے جب کہ جنوبی افریقہ کی شبنم اسماعیل 123 وکٹیں حاصل کرکے پانچویں نمبر پر ہیں ۔ واضح رہے کہ انگلینڈ ویمن نے دوسرے ٹی ٹوئنٹی میں پاکستان ویمن کو 65 رنز سے شکست دے کر سیریز میں 2-0 کی ناقابل شکست برتری حاصل کر لی۔