شاہ زیب نے ایشین تائیکوانڈو چیمپئن شپ کی تاریخ میں پاکستان کیلئے پہلا سلور میڈل جیت لیا

ہنوئی (اُردو پوائنٹ اخبارتازہ ترین - این این آئی۔ 18 مئی2024ء) ایشین تائیکوانڈو چیمپئن شپ کے کیروگی ایونٹ کے 54 کیٹیگری کے فائنل میں سعودی عرب کے حمدی ریاد نے پاکستان کے شاہ زیب خان کو شکست دیکر گولڈ میڈل اپنے نام کرلیا۔ویتنام میں ہونے والی چیمپئن شپ کے فائنل کے پہلے رائونڈ میں شاہ زیب نے اپنے سعودی مدمقابل کے خلاف ایک صفر سے کامیابی حاصل کی۔

دوسرے رائونڈ میں دونوں کھلاڑیوں کے مابین سخت مقابلے دیکھنے میں آیا جس میں حمدی ریاد نے 8 کے مقابلے میں 9 پوائنٹس حاصل کرکے کامیابی حاصل کی۔

(جاری ہے)

تیسرے اور فیصلہ کن رائونڈ میں ریفری نے جانبداری کا مظاہرہ کرتے ہوئے پاکستان کے خلاف کئی متنازعہ فیصلے دئیے۔حمدی ریاد نے 3 کے مقابلے میں 7 پوائنٹس کے فرق سے گولڈ میڈل جیت لیا جبکہ شاہ زیب خان سلور میڈل کے حق دار ٹھہرے۔

شاہ زیب خان نے ایشین تائیکوانڈو چیمپئن شپ کی تاریخ میں پاکستان کیلئے پہلا سلور میڈل جیتا ہے۔ کھیلے گئے دیگر مقابلوں میں 87 ویٹ میں پاکستان کے احتشام الحق کو بھارت کے ریشبھ نے 2-1 شکست دی۔اس کے علاوہ 58 کیٹیگری میں سعودی عرب کے جار یوسف نے پاکستان کے ابوبکرصدیق کیخلاف 2-1 سے کامیابی حاصل کی جبکہ خواتین کی 73 ویٹ میں کوریا کی مایونگ می نا نے پاکستان کی ملیحہ کو 2-0 سے ہرا دیا۔