خیبر پختونخوا انڈر 23ریجنل گیمز، پشاور ریجن مردوں کے ٹرائلز جمعرات کو منعقد ہونگے

پشاور (اُردو پوائنٹ اخبارتازہ ترین - اے پی پی۔ 22 مئی2024ء) خیبرپختونخوا انڈر23 ریجنل گیمز کے سلسلے میں پشاور ریجن مردوں کے ٹرائلز (کل) جمعرات کو منعقد ہونگے جس میں ڈسٹرکٹ چارسدہ، مہمند، خیبر، نوشہرہ اور پشاور ڈسٹرکٹ کے میل کھلاڑی شرکت کریں گے۔ ریجنل سپورٹس آفیسرپشاور کاشف فرمان کے مطابق ڈائریکٹوریٹ جنرل خیبر پختونخوا کے زیر انتظام خیبر پختونخوا انڈر 23ریجنل گیمزڈسٹرکٹ پشاور،چارسدہ،نوشہرہ،مہمند اور خیبر کی ٹیموں کے انتخاب کے لئے ٹرائلز شیڈول کا اعلان کردیا۔

پشاور ریجن کی خواتین ٹرائلز 22 جبکہ مردوں کے ٹرائلز 23 مئی کو پشاور کے مختلف مقامات پر ہوں گے تاکہ مختلف کھیلوں کی ٹیمیں انڈر 23گیمزکے لئے تیار کی جائیں۔انڈر 23گیمز 28مئی سے شروع ہونگے۔ کھلاڑیوں کی تاریخ پیدائش یکم جون 2001 ء ہونی چاہیے۔

(جاری ہے)

یکم جون 2001 ء کے بعد پیدا ہونے والے افراد ٹرائلز میں حصہ لینے کے اہل ہیں۔ کھلاڑیوں کو مشورہ دیا گیا ہے کہ وہ فارم بی اور قومی شناختی کارڈ لے کر آئیں تاکہ ان کی عمر کا تعین کیا جا سکے۔

کرکٹ کے لئے ٹرائلز معاذ اللہ خان کرکٹ اکیڈمی پشاور سپورٹس کمپلیکس ،فٹبال کے لئے طہماس سٹیڈیم کا انتخاب کیا گیا جبکہ اتھلیٹکس کے ٹرائلز حیات آباد سپورٹس کمپلکس میں صبح دس بجے ہونگے۔والی بال،بیڈمنٹن، سکواش،ٹیبل ٹینس،کراٹے اور تائکوانڈو کے کھلاڑیوں کی سیلیکشن پشاور سپورٹس کمپلکس قیوم اسٹیڈیم میں سہ پہر تین بجے ہونگے۔تھرو بال کے ٹرائلز اسی روز 23مئی ہی کو سہ پہر تین بجے طہماس اسٹیڈیم پشاور شہر میں ہونگے۔ ان ٹرائلز میں منتخب ہونے والے کھلاڑیوں کو ڈائریکٹوریٹ جنرل آف سپورٹس خیبرپختونخوا کی جانب سے کٹ، جوتے اور ٹی اے ڈی اے فراہم کیا جائے گا جبکہ ٹرائلز کے دوران کوئی ٹی اے ڈی اے نہیں دیا جائے گا۔