ہیرو اوپن ملائیشیا انٹرنیشنل تائیکوانڈو چیمپئن شپ میں پاکستان کے 4 تمغے

اسلام آباد (اُردو پوائنٹ اخبارتازہ ترین - اے پی پی۔ 10 اگست2025ء) پاکستانی کھلاڑیوں نے ہیرو اوپن ملائیشیا انٹرنیشنل تائیکوانڈو چیمپئن شپ میں شاندار کارکردگی کا مظاہرہ کرتے ہوئے 2 طلائی اور 2 چاندی کے تمغے اپنے نام کیے، چیمپئن شپ میں 20 ممالک کے 2000 سے زائد کھلاڑی شریک تھے۔اتوار کو جاری تفصیلات کے مطابق محمد عمر نے سینیئر کیٹیگری میں چینی حریف کو شکست دے کر طلائی تمغہ حاصل کیا۔

(جاری ہے)

سید حمزہ شاہ نے ملائیشیا، تھائی لینڈ اور انڈونیشیا کے کھلاڑیوں کو مات دے کر دوسرا طلائی تمغہ پاکستان کے نام کیا۔شمیل علی حسین نے شاندار کھیل کا مظاہرہ کرتے ہوئے تین مسلسل مقابلے جیتےتاہم فائنل میں معمولی فرق سے ہار کر چاندی کا تمغہ حاصل کیا۔حماد ندیم نے بھی شاندار کارکردگی دکھاتے ہوئے فائنل تک رسائی حاصل کی اور چاندی کا تمغہ جیتا۔ترجمان کے مطابق یہ کامیابی نہ صرف قومی فخر کا باعث ہے بلکہ بین الاقوامی کھیلوں میں پاکستان کے مثبت امیج کو بھی اجاگر کرتی ہے۔