کوچ نولبرٹو سولانو کی موجودگی نہ صرف قومی ٹیم بلکہ ہمارے کوچز کے لئے بھی سیکھنے کا سنہری موقع فراہم کرے گی، سید محسن گیلانی

اسلام آباد (اُردو پوائنٹ اخبارتازہ ترین - اے پی پی۔ 21 اگست2025ء) پاکستان فٹ بال فیڈریشن کے صدر سید محسن گیلانی نے کہا ہے کہ کوچ سولانو کی موجودگی نہ صرف قومی ٹیم بلکہ ہمارے کوچز کے لئے بھی سیکھنے کا ایک سنہری موقع فراہم کرے گی، پاکستان کی تاریخ میں اس سطح کا بین الاقوامی کوچ پہلے کبھی مقرر نہیں کیا گیا۔ ان خیالات کا اظہار انہوں نے ہیڈ کوچ نولبرٹو سولانو کے ہمراہ لاہور میں میڈیا سے گفتگو کرتے ہوئے کیا۔

انہوں نے کہا کہ ان کا تجربہ پاکستان میں جدید فٹ بال کے فروغ میں کلیدی کردار ادا کرے گا۔ انہوں نے مزید کہا کہ فیفا اور ایشین فٹ بال کنفیڈریشن نے پاکستان میں فٹ بال کے فروغ کے لئے مکمل تعاون کی یقین دہانی کرائی ہے۔ پاکستان کی مینز سینئر اور انڈر 23 قومی ٹیموں کے ہیڈ کوچ نولبرٹو سولانو نے اپنے خیالات کا اظہار کرتے ہوئے کہا کہ سب سے پہلے میں پی ایف ایف کے صدر سید محسن گیلانی کا شکریہ ادا کرتا ہوں جنہوں نے مجھے یہ موقع دیا، یہ میرے لئے ایک بڑی ذمہ داری اور چیلنج ہے۔

(جاری ہے)

انہوں نے کہا کہ میں پاکستان فٹ بال کو درپیش مسائل سے آگاہ ہوں لیکن کیمپ میں گزارے گئے چند دنوں میں مجھے بے پناہ ٹیلنٹ دیکھنے کو ملا ہے، کھلاڑی پرجوش ہیں اور فٹ بال کھیلنے کا جذبہ رکھتے ہیں۔ انہوں نے مزید کہا کہ فی الحال ہماری توجہ انڈر 23 سکواڈ پر ہے اور ہم پوری محنت اور عزم کے ساتھ میدان میں اتریں گے۔