حارث رئوف نے آج تک کتنے میچز جتوائے؟، سابق کرکٹرز نے پیسر کو آڑے ہاتھوں لے لیا

حارث نے بڑے میچز نہیں جتوائے، ہم سب کو میلبورن کا میچ یاد ہے جہاں پر کوہلی نے انہیں دو چھکے جڑے تھے : کامران اکمل

ذیشان مہتاب بدھ 1 اکتوبر 2025 16:54

حارث رئوف نے آج تک کتنے میچز جتوائے؟، سابق کرکٹرز نے پیسر کو آڑے ہاتھوں لے لیا

لاہور (اردو پوائنٹ تازہ ترین اخبار ۔ یکم اکتوبر 2025ء ) بھارت سے ایشیا کپ فائنل میں شکست کے بعد فاسٹ بولر حارث رؤف کو تنقید کا نشانہ بنائے جانے کا سلسلہ جاری ہے۔

ایک ٹی وی پروگرام میں سابق بیٹر محمد یوسف نے کہا کہ ہمیں حارث روف کو سمجھنا ہوگا، اس نے کتنے میچز جتوائے ہیں، انہیں اختتامی اوورز میں بولنگ کرنا ہی نہیں چاہیے۔

محمد یوسف نے کہا کہ گزشتہ ورلڈکپ دیکھ لیں، ہر جگہ حارث کی پٹائی ہی ہوئی ہے۔

(جاری ہے)

سابق وکٹ کیپر بیٹر کامران اکمل نے کہا کہ حارث روف نے بڑے میچز نہیں جتوائے، ہم سب کو میلبرن کا میچ یاد ہے جہاں پر کوہلی نے انہیں دو چھکے جڑے تھے۔

کامران اکمل کا مزید کہنا تھا کہ کپتان کو سمجھنا چاہیے تھا کہ اس قسم کی صورتحال میں کون سا بولر بہتر رہے گا، ہم سیکھ ہی نہیں رہے، ایک ہی جیسی غلطیاں کرتے جارہے ہیں۔

سابق آف اسپنر توصیف احمد نے کہا کہ ہم کہتے ہیں کہ کرکٹ میں کچھ بھی ہوسکتا ہے مگر کیوں ایسی چیزیں صرف حارث رؤف کے ساتھ ہی ہوتی ہیں، ہمیں بھی چھکے پڑتے تھے مگر ہر وقت ایسا نہیں ہوتا تھا۔

سابق کپتان راشد لطیف نے کہا کہ سلمان آغا کو وہ اوور حارث روف کو نہیں دینا چاہیے تھا، ابرار احمد کو بولنگ کرنا چاہیے تھی، صائم کو بھی گیند دی جاسکتی تھی۔

وقت اشاعت : 01/10/2025 - 16:54:26