خواہش ہے کہ پاکستان اسکواش میں اپنا کھویا ہوا مقام دوبارہ حاصل کرے ،جس کیلئے نئے اور باصلاحیت کھلاڑیوں کو سامنے لانا ضروری ہے، خصوصی پروگرام کے تحت ملک بھر سے نئے ٹیلنٹ کا انتخاب کرکے تربیت دی جا رہی ہے

کراچی((اُردو پوائنٹ اخبار تازہ ترین۔ 30 مئی۔2015ء) )سابق عالمی چیمپئن جہانگیر خان نے کہا ہے کہ میری کوشش اور خواہش ہے کہپاکستان اسکواش میں اپنا کھویا ہوا عالمی مقام دوبارہ حاصل کرے جس کیلئینئے اور باصلاحیت کھلاڑیوں کو سامنے لانا ضروری ہے، اس ضمن میں خصوصی پروگرام کے تحت ملک بھر سے نئے ٹیلنٹ کا انتخاب کرکے انھیں تمام تر سہولیات فراہم کرتے ہوئے تربیت دینے کا سلسلہ جاری ہے،امید ہے کہ اس منصوبہ بندی کے نتیجے میں پاکستان کو عالمی سطح کے کھلاڑی میسر آسکیں گے۔

ملائیشیا میں یکم تا 6 جون تک شیڈول انٹرنیشنل جونیئر ایونٹس میں عباس شوکت انڈر19 ایونٹ میں شرکت کریں گے، 3 کھلاڑی منصور زمان، مہران جاوید اور کاشف آصف انڈر17 ایونٹ کا حصہ بنیں گے، عون عباس انڈر 15 ایونٹ میں اپنی صلاحیتوں کی جانچ کرائیں گے جبکہ حطیفہ ابراہیم انڈر 11 ایونٹ میں کارکردگی کا امتحان دیں گے۔

(جاری ہے)

جہانگیر خان کی زیر نگرانی تربیت پانے والے ان کھلاڑیوں کا انتخاب اہلیت کی بنیاد پر کیا گیا ہے۔

پروگرام کے ڈائریکٹر سعید خان نگران اور آصف خان کوچ کی حیثیت سے ملائیشیا جارہے ہیں۔جہانگیر خان نے کہا ہے کہ ملک میں باصلاحیت اور ابھرتے ہوئے کھلاڑیوں کو سامنے لانے کے لیے کاوشیں جاری ہیں، نئے چیمپئن تلاش کرنے کے پروگرام کے تحت زیر تربیت 6 جونیئر کھلاڑی ہفتے کو ملائیشیا روانہ ہورہے ہیں جہاں وہ پیر سے شروع ہونے والے پینانگ انٹرنیشنل ٹورنامنٹ میں شرکت کریں گے۔اپنے دور کے عظیم کھلاڑی نے کہا کہ ان کھلاڑیوں کو انٹرنیشنل ایونٹس میں شرکت کے مواقع فراہم کرنے کا مقصد تجربے میں اضافہ کرنا ہے، غیرملکی دوروں سے ان میں اعتماد بھی آئے گا۔