انسانیت پر حضور ﷺ کا فیض

اللہ نے بنی نوع انسان کی ہدایت کے لئے ایک لاکھ چوبیس ہزار پیغمبر بھیجے-  ان تمام انبیاء اور رسل کی رہنمائی صرف مخصوص علاقے، اور، اپنی قوم تک تھی  - لیکن وہ سب یہی بتاتے رہے کہ ہمارے بعد بھی ایک نبیﷺ نے آنا ہے-  جن پر دین کی تکمیل ہو گی-  اس کے بعد  جو نبوت کا دعویٰ کرے گا  وہ جھوٹا ہو گا-اسی لئے  اب قیامت تک کوئی نبی نہیں آئے گا-
ان تمام انبیاء میں سب سے افضل مقام آقائے دو جہاں محمد مصطفیٰ صلی اللہ علیہ والہ وسلم کا ہے-کیونکہ آپﷺ مجسم قرآن ہیں-آپ ﷺ کے مرتبے کو سب سے بلند کرنے کے لئے اللہ رب العزت نے آپ ﷺکو تمام انبیاء کرام کے بعد تمام انسانوں کی رہنمائی اور ہدایت کے لئے مبعوث فرمایا - ربیع الاول وہ مبارک مہینہ ہے- جس میں آپﷺ اس دنیا میں تشریف لائے-
پوری انسانیت جو جہالت کے اندھیرے میں ڈوبی تھی- آپﷺ کی آمد پر تمام اندھیرے مٹ گئے- یہ آپ ﷺ کا ہی فیض تھا -وہ لوگ جو برائیوں کی دلدل میں پھنس چکے تھے- ان سے نکلنا ان کے لئے مشکل ہی نہیں ناممکن تھا- آپﷺ کا ان میں ظہور ان کی خوش قسمتی کی علامت بنا- آپﷺ نے آکر پوری انسانیت کا تعلق اللہ تعالیٰ سے جوڑا.

اور آپﷺکی سیرت اور اخلاق سے  پوری انسانیت مسکرانے لگی-
وہ لوگ جو بتوں کی عبادت میں مصروف رہتے تھے-بے حیائی عام تھی- انہوں نے کئ خدا بنا رکھے تھے- ایسے میں اللہ تعالیٰ نے ان لوگوں میں آپﷺکی بعثت فرمائی-  پوری انسانیت کے لئے آپﷺ نور بن کر آئے-
اللہ تعالیٰ کی رحمت اور آپﷺ کی کوششوں سے اسلام پھیلتا چلا گیا- آپﷺ نے اپنے اخلاق و کردار اور تربیت سے ایسے لوگ تیار کئے-جو ایمان، یقین اور اخلاق کی بلندیوں اور عظمتوں پر فائز ہوئے-
آپﷺ کی تعلیمات کا اثر تھا وہ لوگ جو ایکدوسرے کی جان کے دشمن تھے- ان کے مابین محبت کی ایسی فضا قائم ہوئی-جس کی نظیر کہیں نہیں ملتی- یہ لوگ دشمن کے لئے فولاد سے بھی زیادہ طاقتور بن گئے-جنہوں نے کم وسائل میں اسلام دشمنوں کا ڈٹ کر مقابلہ کیا- اور فتح و نصرت ہمیشہ ان کا مقدر بنی- انہوں نے اپنی زندگیاں اسلام اور آپﷺکے لیے وقف کر دیں-
یہ آپﷺ کی عظمت کا نتیجہ تھا- کہ ایسی قوم تیار ہوئی جو محبت، اخلاق اور ایثار کا اعلیٰ نمونہ بنی- تمام مسلمان اس دن کو جب عرب میں طیبہ کا چاند چمکا-نہایت جوش و خروش سے مناتے ہیں- محفلیں منعقد ہوتی ہیں- تقاریر ہوتی ہیں- جلوس نکلتے ہیں، چراغاں کیا جاتا ہے- یہ تمام چیزیں قوموں کی زندہ دلی، ولولہ، جوش وجذبے اور عقیدت کا منظر پیش کرتی نظر آتی ہیں-یہ بات درست ہے کہ  قومی تہوار کسی قوم کے ولولے اورجذبے کو قائم رکھنے میں اہم کردار ادا کرتے ہیں- لیکن محض تہوار منا کر اصل مقصد کو  بھول جانا کامیابی کی دلیل نہیں ہو سکتا-
ہم آپﷺکے آنے کی خوشیاں ضرور منائیں- اور اس بات کا شکر ادا کریں کہ ہم آپﷺ کے امتی ہیں-لیکن ہمیں یہ بات بھی زہن میں رکھنی چاہیے-کہ ہم اسوقت تک سچے مسلمان نہیں بن سکتے- جب تک ہم آپﷺ کی تعلیمات پر مکمل عمل نہیں کرتے- بلکہ یوں کہیے ہمارا ایمان اسوقت تک مکمل نہیں ہو سکتا- جب تک ہمارے دل میں اپنے مال، اولاد، ماں باپ اور اپنی جان سے زیادہ
 آپﷺسے محبت نہیں ہو گی-
کیونکہ آپﷺ کی زندگی نہ صرف  ہمارے لئے  بلکہ پوری انسانیت کے لئے مشعل راہ ہے-آپﷺنے اپنے اخلاق وکردار سے ثابت کیا کہ آپﷺ ہر لحاظ سے ایک عظیم انسان ہیں- آپﷺنے انتہائی سادہ زندگی بسر کی- اپنے ہر عمل سے آپﷺنے یہ ثابت کیا کہ آپﷺ
اخلاق کے اعلیٰ درجے پر فائز رہے- حضرت عائشہ رضی اللہ عنہا سے آپﷺکے اخلاق کے بارے میں پوچھا گیا- آپ رضی اللہ عنہا نے فرمایا
"آپﷺکا اخلاق قرآن ہے." اور جس نے قرآن کو سمجھنا ہو وہ سیرتِ رسول ﷺ کو دیکھ لے-"جس نے سیرتِ رسول ﷺ کا مطالعہ کرنا ہو، وہ قرآن پاک کا مطالعہ کر لے-" آج ہم دوسری قوموں سے پیچھے اس لئے رہ گئے  ہیں کہ ہم نے آپﷺ کی تعلیمات کو پس پشت ڈال دیا ہے- ہم پھر سے جہالت کی طرف گامزن نظر آتے ہیں.

جبکہ بحیثیت مسلمان ہمیں آپﷺکے اسوہ ء حسنہ پر عمل کرنا چاہیے-اور آپﷺ سے محبت کا تقاضا ہے کہ آپﷺ
کی ذات اقدس پر بے حدو بے شمار درور و سلام بھیجا جائے-اپنے اخلاق وکردار کو آپﷺ کے راستے اور اسوہ کے مطابق ڈھال کر ایک سچے مسلمان اور  آپﷺ کے امتی ہونے کا بہترین ثبوت دیا جائے -
آپﷺ کی تعلیمات پر عمل کرتے ہوئے ضرورت مندوں کی مدد کی جائے - بھوکوں کو کھانا کھلایا جائے-اور ہمیشہ دوسروں کی مدد کے لئے تیار رہیں - عید میلاد النبیﷺ  منانے کا بہترین طریقہ یہی ہے  آپﷺ کی سنت کو زندہ کیا جائے - اور آپﷺ کے اصولوں کو اپنی زندگی میں شامل کر کے آپﷺ سے محبت کا عملی ثبوت دیا جائے - آپﷺ نے ہمیں ایمان کی جس دولت سے بہرہ ور کیا ہے-اور ہمارے دلوں کو جس  نور سے منور کیا - اس نور سے ہم اپنے دلوں کو نورانی بنا کر آپﷺ کی بعثت کے مقصد کو سمجھیں - اور اپنی باقی کی زندگی کو حقیقی معنوں میں آپﷺ کے اس نور سے منور کر کے دنیا و آخرت میں کامیابی حاصل کریں - کیونکہ اللہ رب العزت نے آپﷺ کے ذریعے ہمیں مکمل ضابطہ حیات دیا-آپ ﷺنے اپنے عمل سے یہ ثابت کیا کہ اللہ تعالیٰ کا پسندیدہ دین، دین اسلام ہی ہے-
آج ہمارے زوال کی اصل وجہ ہی یہی ہے کہ ہم نے اللہ تعالیٰ کے احکامات اور
آپﷺ کی تعلیمات کو بھلا دیا ہے-پستی ہمارا مقدر بنتی جا رہی ہے-نہ ہمارے سجدوں میں وہ تاثیر ہے نہ دعاؤں میں اثر - ہمارے لئے ازحد ضروری ہے کہ آپﷺکی اطاعت وبندگی کو اپنائیں -تاکہ دنیا میں پھر سے اسلام کا بول بالا ہو-اور مسلمان اپنے حقیقی تشخص کو برقرار رکھ سکیں - کیونکہ آپﷺ ہماری آنکھوں کا نور اور دل کا سرور ہیں - جب تک ہم عملی طور پر اس نور اور، سرور کو حاصل کرنے کی کوشش نہیں کریں گے تب تک ہمیں کامیابی نہیں ملے گی-
اللہ تعالیٰ نے بھی اپنے محبوب ﷺکی اطاعت کا حکم دیا ہے _
اللہ تعالیٰ کا ارشاد ہے-"اے محبوب ﷺ ان سے فرما دو :اگر تم اللہ تعالیٰ سے محبت کرتے ہو تو میری تابعداری کرو تو اللہ تمہیں اپنا محبوب بنا لے گا" (آل عمران)
گناہوں کی بخشش کے لئے آپ ﷺ پر ایمان، آپ ﷺ کی پیروی اور آپ ﷺ سے محبت بے حد ضروری ہے - اس کے بغیر دنیا و آخرت میں کامیابی ممکن نہیں -