بیجنگ انٹرنیشنل کائٹ فیسٹیول2021

بدھ 29 ستمبر 2021

خزاں کی آمد کے ساتھ ہی بیجنگ میں تیز ہوائیں چلنے لگتی ہیں۔ ہواؤں میں بڑھتی خنکی نہ صرف موسم کو خوشگوار بناتی ہے بلکہ لوگوں کو تفریحی مقامات خصوصاً پارکس میں نکلنے پر مجبور کرتی ہیں۔ اسی شاندار میں موسم میں بیجنگ میں نویں انٹرنیشنل کائٹ فیسٹیول کا آغاز ہوا۔ یہ دوسری مرتبہ ہے کہ اس موقع پر پتنگ بازی کا مقابلہ بھی منعقد کیا گیا۔

چائنا ریڈیو انٹرنیشنل نے اپنے فارن ایکسپرٹس کو اس کائٹ فیسٹیول میں شرکت کا شاندار موقع فراہم کیا۔ یہ ایک شاندار تجربہ تھا۔ بیجنگ کا شفاف نیلا آسمان مختلف رنگ اور شکل کی خوبصورت پتنگوں سے سجا ہوا تھا۔ تیز ٹھنڈی ہواؤں، بادلوں اور سورج کی آنکھ مچولی، آسمان پر رقصاں پتنگوں اور وہاں موجود شرکاء کے چہروں پر موجود مسکراہٹ اور خوشی نے ماحول کو اور زیادہ خوشگوار بنا دیا۔

(جاری ہے)

یہاں بیجنگ میں زیر تعلیم پاکستانی طلبہ سے بھہ ملاقات ہوئی۔ وہ بھی اس موقع پر بہت زیادہ مسرور دکھائی دے رہے تھے کیونکہ پاکستان میں بھی لوگ پتنگ بازی سے شغف رکھتے ہیں۔ ان نوجوانوں میں محمد یاسر علی، محمد آفاق احمد، محمد احسن اور ایمل سے مل کر بڑی خوشی ہوئی۔
چین میں پتنگ بازی کی روایت بہت زیادہ قدیم ہے۔ دنیا کے اکثر دیگر ملکوں کی نسبت چین میں پتنگ بازی کا رحجان زیادہ ہے۔

چین کا شائد ہی کوئی ایسا علاقہ ہو جہاں پتنگ نہ اڑائی جاتی ہو۔ اسی باعث یہاں ہر سال پتنگ بازی کے حوالے سے عالمی میلوں کا انعقاد کیا جاتا ہے اور اس کی سر پرستی مقامی حکومتیں کرتی ہیں۔ پتنگ بازی کی ان عالمی تقاریب میں نہ صرف چین بلکہ دنیا بھر سے ماہر پتنگ باز شرکت کرتے ہیں۔اس موقع پر نہ صرف پتنگ بازی کی جاتی ہے بلکہ پتنگ بازی کے شوقین افراد کے درمیان مقابلوں کا ہتمام بھی کیا جاتا ہے۔

یہاں مختلف اشکال میں پتنگیں تیار کی جاتی ہیں جو کاریگروں کی مہارت کا منپ بولتا ثبوت ہیں۔ا نسانی اشکال والی پتنگیں تو لوگوں کی دلچسپی کا خصوصی مرکز ہوتی ہیں ۔انہیں دیکھ کر لگتا ہے کہ شائد کوئی مجسمہ ہے یا ایک خاتون ماڈلنگ کر رہی ہے لیکن درحقیقت یہ چین میں پتنگ سازی کے کمالات ہیں۔ اس کے ساتھ ساتھ جو چین کے جو روایتی ملبوسات ہیں ان کی عکاسی بھی پتنگوں کے مختلف نمونوں میں دیکھی جا سکتی ہے۔

اسی طرح مختلف جانداروں کی شکلوں والی پتنگوں کے ڈیزائنز تو دیکھنے سے تعلق رکھتے ہیں۔ شرکاء چینی فنکاروں کو داد دیے بغیر تو رہ ہی نہیں سکتے۔ان نمونوں میں رنگوں کا دلکش استعمال اور خوبصورت مصوری اپنی مثال آپ ہے۔ارے بھئ پھول ،پودے ،ملبوسات ، چھتریاں، طوطا ، چڑیا ، چیل ، کچھوا حتی کہ چیتے کے جارحانہ انداز کو بھی آپ ان بڑے سائز کی پتنگوں میں دیکھ سکتے ہیں۔

بیجنگ میں ایک نمائش حال بھی موجود ہے۔ آپ اس خوبصورت ہال میں منقعدہ پتنگ بازی کی نمائش میں جوں جوں آپ اندرونی حصوں کا رخ کریں گے مزید دلکش رنگوں کو اپنا منتظر پائیں گے۔ چین کے جدید اور قدیم ثقافتی رنگوں کو بھی آپ پتنگوں کی صورت میں دیکھ سکتے ہیں۔اس ضمن میں ایک خاص بات یہ بھی ہے کہ چین میں عام روزمرہ ذندگی میں جن رنگوں کا استعمال زیادہ کیا جاتا ہے وہ آپ کو پتنگ سازی میں بھی نظر آ تے ہیں۔

بیجنگ کے سالانہ پتنگ بازی کے عالمی میلے میں جہاں نہ صرف پتنگیں اڑائی جاتی ہیں بلکہ شرکاء کی دلچسپی کی خاطر نما ئش کا انعقاد بھی کیا جاتا ہے۔
اس خوبصورت اور زندگی سے بھرپور ماحول نے نہ صرف چین کی حاصل کردہ کامیابیوں پر گواہی دی بلکہ یہ دنیا کے لئے بھی خوشی کا پیغام ثابت ہوگا۔ چین میں معمولات زندگی کی بحالی نے مایوسی کے اندھیروں میں ڈوبی دنیا کو یہ واضح پیغام دیا ہے کہ اگر نظم و ضبط اور اتحاد کا مظاہرہ کیا جائے تو وبا کو شکست دی جاسکتی ہے۔ آج بیجنگ کے آسمان پر بکھرے زندگی کے یہ رنگ پوری دنیا کے لئے امید کی کرن ہیں۔

ادارہ اردوپوائنٹ کا کالم نگار کی رائے سے متفق ہونا ضروری نہیں ہے۔