سہولت مراکز سے فرد برائے ریکارڈ 5منٹ سے بھی کم دورانیے میں حاصل ہوگی،لینڈریکارڈ اتھارٹی

راولپنڈی ۔ (اُردو پوائنٹ اخبارتازہ ترین۔ 18 اپریل2018ء) پنجاب لینڈ ریکارڈز اتھارٹی کے نادرا کے ساتھ طے پانے والے حالیہ معاہدے کے بعد ضلع راولپنڈی کے 134سے زائد ای سہولت مراکز سے فرد برائے ریکارڈ حاصل کی جاسکے گی۔راولپنڈی میں قائم 69سے زائد ای سہولت مراکز سے فرد برائے ریکارڈ 5منٹ سے بھی کم دورانیے میں حاصل کی جاسکے گی۔ضلع راولپنڈی کی دیگر تحصیلوں گوجر خان19، کلر سیداں 15، کہوٹہ12،ٹیکسلا 16اور مری میں قائم نادرا کے 3ای سہولت مراکز سے فرد برائے ریکارڈباآسانی حاصل کی جاسکے گی۔

ضلع راولپنڈی میں قائم آٹھوں اراضی ریکارڈسنٹرز پر 90% سے زائدرش میں کمی واقع ہوگی۔عوام کو دور درازواقع دیہاتوں اور قصبات سے اراضی ریکارڈ سنٹر نہیں آنا پڑے گا بلکہ ان کے یہاںگلی محلوں میں قائم نادرا ای سہولت مراکز سے ہی خدمات حاصل کی جاسکیں گی۔

(جاری ہے)

ابتدائی طور پر فرد کی قیمت 150روپے اور نادرا کی فیس 100روپے مقرر کی گئی ہے۔اس عمل کو شفاف بنانے کیلئے اصل شناختی کارڈ اور بائیو میٹرک تصدیق کے بعد فرد برائے ریکارڈجاری کی جائے گی۔

ای سہولت مراکز پر تربیت یافتہ نمائندے موجود ہیں - اس کے ساتھ ساتھ وہاں تمام ضروری سامان مہیا کر دیا گیا ہے تاکہ سروس کی فراہمی بلا تعطل مہیا کی جاسکے۔ ترجمان پنجاب لینڈر یکارڈز اتھارٹی کا کہنا ہے کہ حکومت عوام کو سہولیات کی بروقت فراہمی کے لیے تمام وسائل بروئے کار لارہی ہے۔ اس انقلابی قدم سے جہاں 8 اراضی ریکارڈسنٹرز سے ضلع کے تمام لوگ خدمات حاصل کر رہے تھے اب ان خدما ت کی فراہمی کے دائرہ کارمیں مزید 134سے زائد سہولت مراکز کا اضافہ کردیا گیا ہے۔

رش کی وجہ سے جہاں لوگوں کو تکلیف اٹھانا پڑتی تھی اور ان کا قیمتی وقت ضائع ہوتا تھاوہاں کچھ عناصر عوام کی اس کمزوری کا فائدہ اٹھا کر ناجائز ذرائع استعمال کر کے ان کے کام کرواتے اورادارے کی بدنامی کا باعث بن رہے تھے۔سہولت مراکز کے قیام کے بعد ان لوگوں کو مایوسی ہوگی جو لوگوں سے پیسے بٹور کر ان کا کام جلدی کروانے کا جھانسا دیتے تھے ۔ کرپشن کے حوالے سے زیرو ٹالیرنس پالیسی واضح ہے اور کرپشن میں ملوث کسی بھی افسر کے خلاف بلا امتیاز تادیبی کاروائی کی جائے گی۔۔پنجاب کے تمام151 اراضی ریکارڈ سنٹرز پر ہیلپ لائن پرمفت کال کیلئے بوتھ قائم کرنے کے پراجیکٹ پر تیزی سے کام جاری ہے۔