راجہ محمد حیدر خان نے تحریک آزادی میں اہم کردار ادا کرتے ہوئے مہاراجہ کی مسلم دشمن پالیسیوں کی ہمیشہ ڈٹ کر مخالفت کی ،

مظفر آباد ۔ (اُردو پوائنٹ اخبارتازہ ترین - اے پی پی۔ 20 اپریل2018ء) صدر آزادجموں وکشمیر سردار مسعود خان نے کہا ہے کہ راجہ محمد حیدر خان نے تحریک آزادی میں اہم کردار ادا کرتے ہوئے مہاراجہ کی مسلم دشمن پالیسیوں کی ہمیشہ ڈٹ کر مخالفت کی اور اپنی جدوجہد کو جاری و ساری رکھا اور انہوں نے ہمیشہ کشمیری عوام کے حقوق اور دادرسی کی جنگ لڑی۔ ان خیالات کا اظہار صدر آزاد جموں وکشمیر نے آج یہاں مظفرآباد میں حیدر میموریل ایسوسی ایشن کے زیر اہتمام راجہ محمد حیدر خان (مرحوم) کی 52ویں برسی کے موقع پر بطور مہمان خصوصی خطاب کرتے ہوئے کیا۔

انہوں نے کہا کہ راجہ محمد حیدر خان ایک جمہوریت پسند ، انسان دوست شخصیت تھے، جنہوں نے ہمیشہ کشمیری عوام کے حقوق اور دادرسی کی جنگ لڑی ۔

(جاری ہے)

انہوں نے ہمیشہ مفاہمت کی سیاست کی تھی ۔ یہی وجہ ہے کہ انہوں نے اس وقت مسلم کانفرنس کی قیادت کی اور کشمیریوں کو متحد رکھا ۔ صدر نے کہا کہ راجہ محمد حیدر خان مقبوضہ کشمیر کے لوگوں کو حق خودارادیت دیئے جانے کے سلسلے میں بھی اپنی آواز بلند کرتے رہے۔

صدر نے کہا کہ ہمیں اپنے قائدین کے نقشے قدم پر اپنے اس مشن کو جاری و ساری رکھنا ہو گا۔ انہوں نے کہا کہ بھارت کی جانب سے کشمیریوں کے قتل عام و ظلم و جبر کا سلسلہ 1947ء سے شروع ہوا جو تا حال جاری ہے۔ انہوں نے کہا کہ 1947ء میں بھارت نے اڑھائی لاکھ کشمیریوں کا قتل عام کیا تھا اور آج بھی بھارتی قابض افواج نے پورے جموں وکشمیر کو محاصرے میں لے رکھا ہے اور اس نے ظلم و استبداد کے تمام ریکارڈ توڑ دیئے ہیں۔

انہوں نے اس بات پر زور دیا کہ مقبوضہ کشمیر کی تشویشناک صورتحال سے عالمی برادری کو آگاہ کرنا ہم سب کی اولین ذمہ داری ہے۔ صدر آزادجموں وکشمیر نے آزادکشمیر کے سیاسی قائدین اور تارکین وطن کمیونٹی کو سلام پیش کرتے ہوئے ان کا شکریہ ادا کیا کہ انہوں نے وزیر اعظم آزادکشمیر کی قیادت میں بھارتی وزیر اعظم نریندر مودی کی برطانیہ آمد پر اس کے خلاف متحد ہو کر احتجاج کیا ۔

انہوں نے حیدر میموریل ایسوسی ایشن کے صدر راجہ ممتاز اور ان کے ساتھیوں کو خراج تحسین پیش کیا کہ وہ ہر سال اس شاندار تقریب کا انعقاد کرتے ہیں۔ تقریب میں وزیر اوقاف و امور دینیہ راجہ عبد القیوم خان ،ممبرقانون ساز اسمبلی چوہدری شہزاد محمود، ممبر قانون ساز اسمبلی ڈاکٹر مصطفی بشیر عباسی و دیگر سیاسی و سماجی شخصیات نے شرکت کی۔