طلال چوہدری کیخلاف توہین عدالت کیس کی سماعت بغیر کارروائی ایک ہفتے کیلئے ملتوی

اسلام آباد (اُردو پوائنٹ اخبارتازہ ترین - آن لائن۔ 30 اپریل2018ء) سپریم کورٹ نے طلال چوہدی کیخلاف توہین عدالت کیس کی سماعت بغیر کسی کارروائی کے ایک ہفتے کے لیے ملتوی کردی ہے جبکہ سپریم کورٹ کے باہر میڈیا سے گفتگو کرتے ہوے طلال چوہدری کا کہنا تھا کہ کل عمران خان کا ری لانچ تھا، ری لانچ اسی چیز کا ہوتا ہے جس کا پہلا لانچ ختم ہو، عمران خان کو کل ری لانچ کرنے کی کوشش کی گئی، وہ خفیہ ہاتھوں کی سیم پراڈکٹ ہے ان پر اتنی محنت ہوئی لیکن زیرو ہی رہے، یہ پروڈکٹ آگے بھی نہیں چلے گی، وہ خفیہ طاقتیں جنہوں نے اس لانچ سے امیدیں لگائی ہوئی تھیں اب وہ الیکشن کہیں ڈیلے نہ کریں کیونکہ انہیں لگتا ہے نوازشریف کلین سوئپ کریگا ۔

انہوں نے کہا کہ عمران خان نے کہا تھا تین ماہ میں حکومت ملی تو کرپشن کا خاتمہ کردیں گے، لیکن کے پی کے میں اینٹی کرپشن کے محکمے کو ہی فارغ کردیا، تعلیم صحت پر توجہ دینے کا کہا تھا، تمام اسپتال شوکت خانم اور یونیورسٹیاں نمل کی طرح چلیں گی لیکن پشاور یونیورسٹی سمیت تمام یونیورسٹیاں جعلی ڈگریاں بانٹ رہی ہیں، خیبرپختونخوا کے اسپتالوں میں کیا تبدیلی آئی انہوں نے کہا کہ ’عمران خان نے 11نکات میں کونسی نئی بات کی، سب پرانی باتیں ہیں، وہ بات ایسے کررہے تھے کہ پچھلے 7 سال آپ پاکستان میں نہیں تھے، آپ نے کے پی کے میں پچھلے 5 سال حکومت کی، اسکرین پر دکھاتے کے پی میں یہ اسپتال ہیں یہ اسکول ہیں لیکن دکھانے کے لیے کچھ ہوتا تو دکھاتے،وزیر مملکت برائے داخلہ کا کہنا تھا کہ 11 نکات میں قوم کو بتائیں خیبرپختونخوا میں پچھلے سال میں کیا کیا، ہم نے سارا جلسہ اس حسرت سے دیکھا کہ ابھی ویڈیو چلائیں گے، کرپشن ختم ہوگئی، تعلیم آکسفورڈ کی طرح ہوگئی لیکن گیارہ نکات میں ایک چیز بھی نہیں ملی پانچ سال کیا کیا ،انہوں نے کہا کہ ’عمران خان نے کہا دو نہیں ایک، عمران اور زرداری دو نہیں ایک ہیں، انہوں نے سینیٹ میں یہ دکھایا اور آگے بھی دکھانے جارہے ہیں، پتا ہے عمران خان نے تیر والوں کو ووٹ دینے کا خفیہ معاہدہ کرلیا ہے،ایک صدر اور دوسرا وزیراعظم کا امیدوار ہے، لیکن اب صدر وزیراعظم سینیٹ کی طرح نہیں بننے دیں گے، یہ پولنگ اسٹیشن کا الیکشن ہے کسی کمرے کا نہیں،طلال چوہدری کا کہنا تھا کہ ’خان صاحب کے پاس اتنے لوٹے کیسے آگئے، کیا پورے پاکستان کا وضو کرانا ہے۔

(جاری ہے)

طلال چوہدری کا کہنا تھا کہ اگر عمران خان فیل ہے تو اس کا مطلب یہ نہیں کہ پاکستان کو فیل کیا جائے، اس کا یہ مطلب نہیں کہ سسٹم فیل ہے، عمران خان کے فیل ہونے کی سزا پاکستان کو نہیں دی جاسکتی، الیکشن وقت پر ہوں گے، جو ہم نہ صرف لڑیں گے بلکہ اسے وقت پر کرنے کے لیے بھی پورا فرض ادا کریں گے ،مسلم لیگ (ن) کے رہنما نے کہا کہ آج ہمیں اصول پر کھڑے رہنے کی سزا مل رہی ہے، کوئی کرپشن نہیں ملی، نوازشریف کو سزا ایک بات کی مل رہی ہے کہ وہ عوام کے مینڈیٹ کے عزت کی بات کیوں کرتا ہے، پچھلے 70 سال کے اسٹیٹس کو کو بدلنے کی بات کیوں کرتا ہے، آنکھوں میں آنکھیں ڈال کر بات کرتا ہے،طلال چوہدری کا کہنا تھا کہ ‘ہم نے کبھی تبدیلی کی باتیں نہیں کی، اپنے آپ کو مومن نہیں ظاہر کیا، جنہوں نے دعوے کیے ان کی 2011 کی تصویر اور 2018 کی گروپ فوٹو دیکھ لیں، پتا نہیں چلتا، پی پی کا جلسہ ہے یا ق لیگ کا، عمران خان نے ایسا ایسا لوٹا لے لیا جو کسی محلے کی مسجد کے بھی کام نہیں آتا۔