آئندہ 6 روز کے دوران کراچی کا درجہ حرارت 40 سے 43 ڈگری سینٹی گریڈ تک جانے کا امکان

کراچی(اُردو پوائنٹ اخبارتازہ ترین - این این آئی۔ 18 مئی2018ء) محکمہ موسمیات نے کراچی میں ہیٹ ویو ایڈوائزری جاری کرتے ہوئے کہا ہے کہ آئندہ 6 روز کے دوران کراچی کا درجہ حرارت 40 سے 43 ڈگری سینٹی گریڈ تک جانے کا امکان ہے ،ْاس سے قبل بھی محکمہ موسمیات کی جانب سے کراچی میں رمضان المبارک کا پہلا ہفتہ شدید گرم ہونے کی پیش گوئی کی گئی تھی۔محکمہ موسمیات کے مطابق سمندری ہوائیں رٴْکنے سے کراچی میں درجہ حرارت 40 سے 43 ڈگری سینٹی گریڈ تک جاسکتا ہے ،ْ اس صورت حال کے باعث شہر میں ہیٹ ویو کا امکان ہے۔

ڈائریکٹر محکمہ موسمیات عبدالرشید نے بتایا کہ ہفتے کو درجہ حرارت میں اضافہ ہوگا، سمندری ہوائیں چلنا بند ہو جائیں گی اور آئندہ چند روز تک شہر میں شدید گرمی رہے گی۔انہوں نے بتایا کہ آئندہ جمعے سے درجہ حرارت بتدریج کم ہونا شروع ہوجائیگا۔

(جاری ہے)

محکمہ موسمیات کی جانب سے ہیٹ ویو ایڈوائزری کراچی کی انتظامیہ، کے الیکٹرک، صوبائی ڈیزاسٹر منیجمنٹ اتھارٹی (پی ڈی ایم ای) اور دیگر اداروں کو بھی بھیجی جاچکی ہے۔

محکمہ موسمیات نے متعلقہ اداروں کو پانی اور بجلی کی فراہمی یقینی بنانے کے لیے کہا ہے۔وزیراعلیٰ سندھ سید مراد علی شاہ نے ہیٹ ویو کے پیش نظر متعلقہ حکام کو ہسپتالوں میں انتظامات کرنے کی ہدایت کردی جبکہ سیکریٹری صحت اور کمشنر کراچی کو موبائل اسپتال سروس متحرک کرنے کی بھی ہدایت کی گئی ہے۔ترجمان وزیراعلیٰ ہاؤس کے مطابق مراد علی شاہ نے کہا کہ ہیٹ اسٹروک سینٹر پر ادویات اور ڈاکٹرز کی موجودگی یقینی بنائی جائے۔ترجمان وزیراعلیٰ کا کہنا تھا کہ ڈپٹی کمشنرز کو بھی ہیٹ اسٹروک سینٹرز متحرک کرنے کی ہدایت کی گئی ہے۔