چنیوٹ میں تحریک انصاف ٹوٹ گئی،عنایت شاہ خاندان نے ہزاروں کارکنوں سمیت پارٹی سے بغاوت کر دی

ہم نے 5 سال پارٹی کی خدمت کی ہے لیکن پارٹی نے ہمارے ساتھ انصاف نہیں کیا اسی لئیے مستعفی ہو رہا ہوں، عنایت شاہ

سید فاخر عباس پیر 11 جون 2018 20:10

چنیوٹ (اردو پوائنٹ تازہ ترین اخبار-11 جون 2018ء) :چنیوٹ میں تحریک انصاف ٹوٹ گئی،عنایت شاہ خاندان نے ہزاروں کارکنوں سمیت پارٹی سے بغاوت کر دی۔تحریک انصاف کے مقامی رہنماعنایت شاہ کا کہنا تھا کہ ہم نے 5 سال پارٹی کی خدمت کی ہے لیکن پارٹی نے ہمارے ساتھ انصاف نہیں کیا اسی لئیے مستعفی ہو رہا ہوں۔تفصیلات کے مطابق پاکستان تحریک انصاف نے ملک کے طول عرض سے اپنے انتخابی امیدواروں کا اعلان کر دیا ہے۔

اس موقع پر پاکستان تحریک انصاف نے بہت سے نظریاتی کارکنان کو نظر انداز کر کے ایسے لوگوں کو ترجیح دی گئی جو نئے نئے تحریک انصاف میں شامل ہوئے تھے تاہم اپنے علاقے میں خاصا اثر و رسوخ رکھتے تھے اور پہلے سے ابھی اپنے حلقوں میں الیکشن یا تو جیت چکے تھے یا پھر جیتنے کی صلاحیت رکھتے ہیں۔

(جاری ہے)

اس اعلان کے بعد پاکستان تحریک انصاف کو شدید پریشانی کا سامنا کرنا پڑ رہا ہے کیونکہ نظریاتی کارکنان نے ٹکٹیں نہ ملنے پر واویلا کھڑا کر دیا ہے ۔

جس روز ٹکٹوں کی تقسیم کی گئی تھی اسی روز سے تحریک انصاف کے کارکنان نے بطور احتجاج بنی گالہ کے سامنے ڈیرے جما لئیے تھے ۔یہ شکایت پورے ملک میں تحریک اںصاف کے کارکنان کو تھی ۔تازہ ترین خبر کے مطابق چنیوٹ میں بھی عنایت شاہ کو ٹکٹ نہ ملنے پر عنایت شاہ خاندان اور انکے حامیوں نے پاکستان تحریک انصاف سے بغاوت کر دی ہے جس کے بعد چنیوٹ میں تحریک انصاف ٹوٹ گئی ہے۔

اس موقع پر عنایت شاہ کا کہنا تھا کہہم نے 5 سال پارٹی کی خدمت کی ہے لیکن پارٹی نے ہمارے ساتھ انصاف نہیں کیا اسی لئیے مستعفی ہو رہا ہوں۔انکا کہنا تھا صرف میں ہی نہیں بلکہ میرے ساتھ 2 ہزار کارکنان بھی پارٹی چھوڑ رہے ہیں ۔اس موقع پر ہزاروں کارکنان نے پارٹی کی رکنیت کارڈ جلا دئیے۔یاد رہے کہ 2013 میں چنیوٹ کے عنایت شاہ خاندان نے پاکستان تحریک انصاف کے سربراہ عمران خان کو سونے کا بلا پیش کیا تھا۔