پاکستان ایٹمی قوت ہے جو کسی اناڑی کے حوالے نہیں کیا جاسکتا،25جولائی کو ن لیگ کو 2013 سے بڑی کامیابی ملنے والی ہے،5 سال پہلے ہمیں 18 سے 20 گھنٹے بجلی نہیں ملتی تھی لیکن آج ہماری زندگی میں 18 سے 20 گھنٹے بجلی موجود ہے، احسن اقبال

نارووال (اُردو پوائنٹ اخبارتازہ ترین - آئی این پی۔ 24 جون2018ء) سابق وزیر داخلہ احسن اقبال کا کہنا ہے کہ پاکستان ایک ایٹمی قوت ہے جو کسی اناڑی کے حوالے نہیں کیا جاسکتا،25جولائی کو ن لیگ کو 2013 سے بڑی کامیابی ملنے والی ہے،5 سال پہلے ہمیں 18 سے 20 گھنٹے بجلی نہیں ملتی تھی لیکن آج ہماری زندگی میں 18 سے 20 گھنٹے بجلی موجود ہے۔اتوار کو سابق وفاقی وزیر داخلہ احسن اقبال نے این اے 78 میں انتخابی مہم شروع کرتے ہو ئے متعدد کارنر میٹنگز اور جلسوں سے خطاب کیا ۔

انہو ں نے کہا کہ ہم نے عوام کی خدمت کی ہے تو وہ کیوں ہمیں ووٹ نہیں دیں گی 25جولائی کو ن لیگ کو 2013 سے بڑی کامیابی ملنے والی ہے۔ 5 سال پہلے ہمیں 18 سے 20 گھنٹے بجلی نہیں ملتی تھی لیکن آج ہماری زندگی میں 18 سے 20 گھنٹے بجلی موجود ہے۔

(جاری ہے)

سابق وزیر داخلہ کا کہنا تھا کہ عوام مسلم لیگ (ن)کی پالیسی کے تسلسل کو ووٹ دیں کیوں کہ پی ٹی آئی کی قیادت اناڑی ہے جس نے میٹرو کے چکر میں پشاور کو کھنڈر بنا دیا، نقل کے لیے بھی عقل کی ضرورت ہوتی ہے۔

انہوں نے کہا کہ ہمارے ضلع میں پی ٹی آئی کے ٹکٹس کی بولی لگ رہی ہے اور جو پارٹی بولی لگا کرٹکٹ دے وہ کیا عوام کی خدمت کرے گی کیوں کہ پیسوں سے عوام کے دل نہیں جیتے جا سکتے۔ان کا کہنا ہے کہ 2013 میں پاکستان میں بیامنی، جہالت اور لوڈشیڈنگ کے اندھیرے تھے لیکن (ن)لیگ نے قوم کو ایک نئی امید دی اور ترقی کے راستے پر ڈال دیا۔مسلم لیگ (ن)کل کراچی سے باضابطہ انتخابی مہم کا آغاز کرے گیانہوں نے کہا کہ پاکستان میں کوئی ایک روپے کی سرمایہ کاری کے لیے تیار نہیں تھا لیکن نوازشریف کی بدولت چین نے سی پیک میں اربوں ڈالر کے منصوبے لگائے جب کہ بلوچستان کی حکومت قوم پرست جماعتوں کو دینا بھی نوازشریف کا کمال ہے۔

سابق وزیر داخلہ کا کہنا تھا کہ پاکستان کو 70 سالوں میں قائد اعظم کا پاکستان نہیں بننے دیا گیا، پاکستان کے عوام کا مقدر آئین، جمہوریت اور ووٹ کی عزت میں ہے۔ان کا کہنا ہے کہ پاکستان ایک ایٹمی قوت ہے جو کسی اناڑی کے حوالے نہیں کیا جاسکتا، ہماری حکومت نے دہشت گردی کی کمر توڑ کر امن کو فروغ دیا اور 10 ہزار میگا واٹ بجلی پیدا کرکے ملک کو اندھیروں سے نکالا۔یاد رہے کہ پاکستان مسلم لیگ(ن)نے احسن اقبال کو قومی اسمبلی کے حلقے این اے 78 سے پارٹی ٹکٹ جاری کیا ہے۔