آصفہ بھٹو زرداری عام انتخابات کے بعد ضمنی الیکشن لیاری یا قمبر شہداد کوٹ میں سے کہاں سے لڑیں گی اس حوالے سے حتمی فیصلہ سامنے نہیں آسکا

بدھ 11 جولائی 2018 23:48

کراچی(اُردو پوائنٹ اخبارتازہ ترین - این این آئی۔ 11 جولائی2018ء) بینظیر بھٹو کی صاحبزادی آصفہ بھٹو زرداری عام انتخابات کے بعد ضمنی الیکشن لیاری یا قمبر شہداد کوٹ میں سے کہاں سے لڑیں گی اس حوالے سے حتمی فیصلہ سامنے نہیں آسکاہے۔آصفہ بھٹو زرداری کے الیکشن لڑنے کے حوالے سے یہ خبرآئی تھی کہ لاڑکانہ اور لیاری سے قومی اسمبلی کی نشستوں پر بلاول بھٹو کی کامیابی کی صورت میں لیاری سے ضمنی الیکشن لڑیں گی ۔

اب انکشاف سامنے آیا ہے کہ انہوں نے این اے 202 قمبر شہداد کوٹ سے کاغذات نامزدگی وصول کئے تھے تاہم عمر 25سال سے چند ماہ کم ہونے کی وجہ سے آصفہ بھٹو زرداری نے کاغذات نامزدگی جمع نہیں کرائے تھے ۔دستاویزات کے مطابق آصفہ بھٹو زرداری کیلئے پرویز احمد ، منصور علی اور محمد صادق نے آراو سے 3 نامزدگی فارم وصول کئے تھے ۔

(جاری ہے)

ذرائع نے بتایاکہ آصفہ بھٹو زرداری کی عمر 25سال سے چند ماہ کم ہونے کی وجہ سے نامزدگی فارم جمع نہیں کروائے گئے،شکار پور سے تعلق رکھنے والے پیپلز پارٹی کے سینئر رہنما آفتاب شعبان میرانی کو این اے 202 کا ٹکٹ دیا گیا ہے ۔

آفتاب شعبان میرانی آصفہ کی عمر 25سال پوری ہونے کے بعد 3 سے 4 ماہ میں مستعفی ہو جائیں گے۔ آئین کے تحت قومی یا صوبائی اسمبلی کا امیدوار ہونے کے لیے کم از کم عمر کی حد 25 سال مقرر ہے۔