سی آئی اے نے سعودی ولی عہد کی ذمے داری سے متعلق کوئی نتیجہ اخذ نہیں کیا، ٹرمپ

میڈیا نے سی آئی اے کے جمال خاشقجی کیس کے جائزے کے بارے میں غلط رپورٹ کیا،امریکی صدرکی تنقید

جمعہ 23 نومبر 2018 12:09

سی آئی اے نے سعودی ولی عہد کی ذمے داری سے متعلق کوئی نتیجہ اخذ نہیں ..

واشنگٹن (اُردو پوائنٹ اخبارتازہ ترین - این این آئی۔ 23 نومبر2018ء) امریکی صدر ڈونلڈ ٹرمپ نے کہا ہے کہ سنٹرل انٹیلی جنس ایجنسی ( سی آئی ای) نے ہرگز یہ نتیجہ اخذ نہیں کیا کہ سعودی ولی عہد شہزادہ محمد بن سلمان نے سعودی شہر ی اور صحافی جمال خاشقجی کے قتل کا حکم دیا تھا۔غیرملکی خبررساں ادارے کے مطابق انھوں نے ایک مرتبہ پھر امریکی میڈیا کو آڑے ہاتھوں لیا ہے اور کہا ہے کہ وہ خاشقجی کیس پر سی آئی اے کے جائزے کے بارے میں غلط رپورٹنگ کا قصور وار ہے۔

انھوں نے کہاکہ میں جرم سے نفرت کرتا ہوں۔جو کچھ ہوا ، میں اس سے نفرت کرتا ہوں،میں اس جرم کو چھپانے پر بھی نفرت کرتا ہوں۔میں آپ کو یہ بتاؤں گا کہ سعودی ولی عہد مجھ سے بھی زیادہ اس جرم سے نفرت کرتے ہیں۔صدر ٹرمپ نے سعودی عرب کی امریکا سے شراکت داری کو اجاگر کرتے ہوئے کہا ہے کہ وہ ایک اہم اتحادی ملک ہے۔

(جاری ہے)

ان کے اس بیان سے ایک روز قبل ہی امریکی وزیر دفاع جیمز میٹس نے کہا تھا کہ وہ یہ خیال نہیں کرتے کہ جمال خاشقجی کے قتل میں ملوث افراد کو سی آئی اے نے شناخت کیا تھا۔

ان کا کہنا تھا کہ خاشقجی کے قاتلوں کو سعودی حکومت یا سی آئی اے نے مکمل طور پر شناخت نہیں کیا ہے۔ان کا کہنا تھاکہ امریکا اس بات میں یقین رکھتا ہے کہ جمال خاشقجی کے قتل کیس میں ملوث افراد کو قانون کے کٹہرے میں لایا جانا چاہیے لیکن ان کے خیال میں سعودی عرب کے ساتھ تعلقات منقطع کرنا ایک غلطی ہوگی ۔