وزیراعظم عمران خان نے آئی سی ٹی پولیس اہلکاروں کیلئے شہداء معاونت پیکج ملک کے دیگر حصوں کے برابر کرنے کی تجویز کی منظوری دیدی

ْپولیس اہلکاروں کو صحت کی ضروریات مہیا کرنے کیلئے صحت انصاف کارڈز کی فراہمی کی بھی منظوری حکومت آئی سی ٹی پولیس کو عوام کی خدمت اور ایک مثالی پولیس فورس بنانے کیلئے ہر ممکنہ معاونت فراہم کرے گی، منشیات کے خلاف مہم کو کامیاب بنانے کیلئے تعلیمی اداروں کے سربراہان اور والدین کو بھی ساتھ لے کر چلا جائے وزیراعظم عمران خان کا آئی سی ٹی پولیس کی کارکردگی اور اسے ماڈل پولیس فورس میں تبدیل کرنے بارے بریفنگ کے موقع پر اظہار خیال

جمعرات 13 دسمبر 2018 22:45

وزیراعظم عمران خان نے آئی سی ٹی پولیس اہلکاروں کیلئے شہداء معاونت ..

اسلام آباد ۔ (اُردو پوائنٹ اخبارتازہ ترین - اے پی پی۔ 13 دسمبر2018ء) وزیراعظم عمران خان نے اسلام آباد کیپٹل ٹیریٹری (آئی سی ٹی) پولیس اہلکاروں کیلئے شہداء معاونت پیکج کو ملک کے دیگر حصوں کے برابر کرنے کی تجویز منظور کر لی جبکہ پولیس اہلکاروں کو صحت کی ضروریات مہیا کرنے کیلئے صحت انصاف کارڈز کی فراہمی کی بھی منظوری دیدی گئی۔ وزیراعظم عمران خان جمعرات کو اسلام آباد کیپٹل ٹیریٹری پولیس کی کارکردگی اور اسے ماڈل پولیس فورس میں تبدیل کرنے کے بارے میں بریفنگ کی صدارت کر رہے تھے۔

بریفنگ میں وزیر خزانہ اسد عمر، وزیر مملکت برائے داخلہ شہریار آفریدی، وزیراعظم کے معاون خصوصی علی نواز، رکن قومی اسمبلی راجہ خرم شہزاد، سیکرٹری داخلہ میجر (ر) اعظم سلمان خان، سیکرٹری اسٹیبلشمنٹ، چیف کمشنر، آئی جی اسلام آباد اور سینئر حکام نے شرکت کی۔

(جاری ہے)

آئی جی اسلام آباد عامر ذوالفقار خان نے وزیراعظم کو آئی سی ٹی پولیس کی کارکردگی کے بارے میں آگاہ کرتے ہوئے خدمات کی فراہمی کو بہتر بنانے اور وفاقی دارالحکومت کے رہائشیوں میں احساس تحفظ پیدا کرنے کیلئے وزیراعظم کی ہدایات پر اٹھائے گئے مختلف اقدامات کو اجاگر کیا۔

آئی جی اسلام آباد نے فورس کی کارکردگی کو مزید بہتر اور ملک کی ماڈل فورس بنانے کیلئے آئی سی ٹی پولیس کو درپیش مختلف انتظامی، قانونی، مالیاتی اور انسانی وسائل کی رکاوٹوںکے بارے میں آگاہ کیا۔ عامر ذوالفقار خان نے وزیراعظم کو منشیات فروشوں، لینڈ مافیا کے خلاف کریک ڈائون اور تجاوزات کے خلاف مہم کے بارے میں پیشرفت سے بھی آگاہ کیا۔

وزیراعظم عمران خان نے وفاقی دارالحکومت میں امن و امان برقرار رکھنے اور سکیورٹی کو یقینی بنانے کے حوالہ سے آئی سی ٹی پولیس کی کاوشوں کو سراہتے ہوئے ہدایت کی کہ آئی سی ٹی پولیس کی ضروریات کو پورا کرنے کیلئے جامع منصوبہ پیش کیا جائے۔ انہوں نے یقین دلایا کہ حکومت آئی سی ٹی پولیس کو عوام کی خدمت اور ایک مثالی پولیس فورس بنانے کیلئے ہر ممکنہ معاونت فراہم کرے گی۔

وزیراعظم نے خدمات کی فراہمی میں بہتری اور کارکردگی کے بارے میں عوامی آراء کے حصول کیلئے آئی سی ٹی پولیس کی طرف سے آئی ٹی سلوشنز کو بروئے کار لائے جانے کو سراہا۔ ڈرگ مافیا بالخصوص تعلیمی اداروں کے اردگرد منشیات فروشوں کے خلاف جاری مہم پر گفتگو کرتے ہوئے وزیراعظم نے ہدایت کی کہ منشیات کے خلاف مہم کو کامیاب بنانے کیلئے تعلیمی اداروں کے سربراہان اور والدین کو بھی ساتھ لے کر چلا جائے۔ لینڈ مافیا کے خلاف کارروائی اور انسداد تجاوزات مہم کے حوالہ سے وزیراعظم نے آئی سی ٹی انتظامیہ، سی ڈی اے اور آئی سی ٹی پولیس کے مابین وسیع تر رابطہ کی ضرورت اور لینڈ مافیا جس نے وفاقی دارالحکومت میں سرکاری اراضی پر قبضہ کر رکھا ہے، کے خلاف کاوشیں جاری رکھنے کی ہدایت کی۔