Live Updates

وزارت ریلوے نے ایم ایل ون کا تازہ ترین پی سی ون وزارت منصوبہ بندی میں جمع کرا دیا

اس میں پچھلے پی سی ون کے مقابلے میں پراجیکٹ کے مجموعی اخراجات میں کمی کی گئی ہے، ترجمان وزارت ریلوے

بدھ 26 فروری 2020 22:10

وزارت ریلوے نے ایم ایل ون کا تازہ ترین پی سی ون وزارت منصوبہ بندی میں ..

اسلام آباد (اُردو پوائنٹ اخبارتازہ ترین - اے پی پی۔ 26 فروری2020ء) وزارت ریلوے نے ایم ایل ون کا تازہ ترین پی سی ون بدھ کو وزارت منصوبہ بندی میں جمع کرا دیا ہے، اس پی سی ون میں پچھلے پی سی ون کے مقابلے میں پراجیکٹ کے مجموعی اخراجات میں کمی کی گئی ہے۔ پچھلے پی سی ون میں اس کا خرچہ9.248 بلین ڈالرتھا جبکہ اس پی سی ون میں اخراجات 9.172 بلین ڈالر تک محدود کئے گئے ہیں۔

قومی اقتصادی کونسل سے اس کی منظوری اپریل 2020ء تک متوقع ہے جس کے بعد اس پراجیکٹ پر باقاعدہ کام شروع کر دیا جائے گا۔ پاکستان ریلوے کے ترجمان کے مطابق پاکستان ریلوے نئے انتظامی ڈھانچے اور بہتر انسانی وسائل کے ساتھ اس پراجیکٹ کو مینج کرے گا۔ یہ مکمل طور پر پاکستان ریلوے کا پراجیکٹ ہے اس میں ایک لاکھ کے قریب لوگوں کو روزگار مہیا کیاجائے گا۔

(جاری ہے)

کراچی سے پشاور تک مین لائن کو تین مرحلوں میں مکمل کیا جائے گا۔ جہاں موجودہ ٹریک کی اپ گریڈیشن اور ڈبل لائن بچھانے کے بعد ٹرینوں کی رفتار 120سے 160 کلومیٹر فی گھنٹہ ہوگی۔اس سے نہ صرف عوام کے پٹرول اور وقت کی بچت ہوگی بلکہ ماحولیاتی آلودگی کو کم کرنے میں بھی یہ منصوبہ مددگار ثابت ہوگا۔ ایم ایل ون کی تکمیل کے بعد کراچی سے لاہور کا فاصلہ10گھنٹے میں ، اسلام آباد سے لاہور کادورانیہ ڈھائی گھنٹے ، لاہو ر سے ملتان کا فاصلہ 3گھنٹے میں، پشاور سے اسلام آبادکا دورانیہ ڈیڑھ گھنٹے میں اور کراچی سے حیدرآباد کا فاصلہ 1گھنٹہ 20 منٹ میں طے ہوگا۔ 1872 کلومیٹر کے اس ٹریک میں کراچی سے پشاور اور ٹیکسلا سے حویلیاں تک مین لائن شامل ہے۔