Live Updates

لاہور ایئرپورٹ پر طیارے سے منسلک بورڈنگ برج خراب، مسافر خوفزدہ

ہفتہ مئی 21:42

لاہور ایئرپورٹ پر طیارے سے منسلک بورڈنگ برج خراب، مسافر خوفزدہ
لاہور(اُردو پوائنٹ اخبارتازہ ترین - آن لائن۔ 23 مئی2020ء) صوبہ پنجاب کے دارالحکومت لاہور میں علامہ اقبال انٹرنیشل ایئرپورٹ پر طیارے سے منسلک بورڈنگ برج خراب ہوگیا جس سے مسافروں میں خوف و ہراس پھیل گیا۔تفصیلات کے مطابق لاہور کے علامہ اقبال انٹرنیشل ایئرپورٹ پر طیارے سے منسلک بورڈنگ برج خراب ہوگیا، مسافروں کے سوار ہونے کے بعد بورڈنگ برج طیارے سے الگ نہیں ہوا۔

اس موقع پر بورڈنگ برج میں خرابی کو مسافر، طیارے میں خرابی سمجھ بیٹھے اور ان میں خوف و ہراس پھیل گیا۔ کچھ مسافر خوف کے باعث طیارے سے اتر گئے۔

(جاری ہے)

بورڈنگ برج میں خرابی کے باعث کراچی جانے والی پرواز ایک گھنٹہ تاخیر سے روانہ ہوئی۔خیال رہے کہ بورڈنگ برج سول ایوی ایشن اتھارٹی کی ملکیت ہوتا ہے، برج کے ذریعے مسافر ایئرپورٹ کی عمارت سے جہاز میں داخل ہوتے ہیں۔

گزشتہ روز قومی ایئر لائن کے طیارے کے خوفناک حادثے نے پورے ملک کو سوگوار کردیا ہے، پی آئی اے کا طیارہ گزشتہ روز لاہور سے کراچی پہنچنے کے بعد لینڈنگ سے صرف چند لمحے قبل آبادی پر گر کر تباہ ہوگیا تھا۔المناک حادثے میں اب تک 97 افراد کی موت کی تصدیق کی جاچکی ہے جبکہ 2 افراد معجزانہ طور پر زندہ بچ گئے جو اسپتال میں زیر علاج ہیں۔
پی آئی اے کی پرواز حادثے کا شکار سے متعلق تازہ ترین معلومات