پنجاب اور دیگر علاقوں میں منگل تک بارش اور آندھی کے باعث گرمی کا زور ٹوٹ جائے گا،محکمہ موسمیات

جمعہ 29 مئی 2020 14:53

لاہور (اُردو پوائنٹ اخبارتازہ ترین - اے پی پی۔ 29 مئی2020ء) محکمہ موسمیات نے منگل کے روز تک پنجاب، اسلام آباد ،خیبر پختونخواہ، شمال مشرقی بلوچستان ، کشمیر اورگلگت بلتستان میں غیر معمولی آندھی اور گرج چمک کے ساتھ بارش کی پیشگوئی کر دی۔ اس دوران بعض مقا مات پر موسلادھار بارش اور ژالہ باری بھی ہو سکتی ہے۔

(جاری ہے)

ترجمان کے مطابق چاول اور کپاس کی کاشت کے علاقوں لاہور، شیخو پورہ، حافظ آ باد، فیصل آباد، گوجرانوالہ، سیالکوٹ، نارووال ،گجرات ، ملتان، ڈی جی خان، راجن پور، بہاولپور، خان پور اور رحیم یار خان میں جمعہ سے منگل کے دوران آندھی اورگرج چمک کے ساتھ بارش کا امکان ہے جبکہ بعض علاقوں میں ژالہ باری بھی متوقع ہے۔

ترجمان کے مطابق ہفتہ اور اتوار کوسکھر، لاڑکانہ ، شہید بینظیر آباد ،میر پور خاص، حیدر آباد ، دادو اور جیک آباد میں گرد آلود ہوائیں چلنے کے علاوہ بارش کا بھی امکان ہے،ترجمان نے کاشتکار حضرات کو بھی مطلع کیاہے کہ حالیہ غیر معمولی بارشوں کو پیش نظر رکھتے ہوئے اپنی فصلوں کو کاشت کریں تاکہ فصلوں کو موسم سے ہونے والے نقصان سے بچایا جا سکے۔