بیرسٹر سلطان محمود کی چیف آرگنائزر سیف اللہ خان نیازی سے ملاقات :

آزاد جموں و کشمیر میں بھرپور انتخابی مہم چلانے کا فیصلہ عمران خان کے کشمیر پر واضح، ٹھوس اور غیر متزلزل مؤقف نے اہلِ کشمیر میں جدوجہد کی نئی امنگ جگائی ہے،بیرسٹر سلطان کارکن تیاری کریں، جلدآزاد جموں و کشمیر کیلئے انتخابی حکمت عملی کا اعلان کریں گے،سیف اللہ خان نیازی

بدھ 12 اگست 2020 21:17

اسلام آباد (اُردو پوائنٹ اخبارتازہ ترین - آن لائن۔ 12 اگست2020ء) تحریک انصاف نے آزاد جموں و کشمیر میں بھرپور انتخابی مہم چلانے کا فیصلہ کیا ہے ۔بدھ کے روز تحریک انصاف آزاد جموں و کشمیر کے صدر بیرسٹر سلطان محمود چودھری نے چیف آرگنائزر سیف اللہ خان نیازی سے خصوصی ملاقات کی ہے جس میں آزاد جموں و کشمیر کی سیاسی صورتحال اور آئندہ انتخابات کی حکمت عملی پر تفصیلی تبادلہ خیال کیا گیا ،دونوں رہنمائوں نے آزاد جموں کشمیر کے آئندہ انتخابات کیلئے بھرپور حکمت عملی کی تیاری اور کسی اتحاد کے بغیر انتخابی میدان میں اترنے کے عزم کو دوہرا ہے ۔

بیرسٹر سلطان محمود نے کہا کہ وزیراعظم عمران خان کے کشمیر پر واضح، ٹھوس اور غیر متزلزل مؤقف نے اہلِ کشمیر میں جدوجہد کی نئی امنگ جگائی ہے،جنگ بندی لکیر کے دونوں اطراف میں بسنے والے کشمیری وزیراعظم کی قیادت سے امیدیں وابستہ کئے ہوئے ہیں،آزاد جموں و کشمیر سیاسی بیداری کے عروج پر ہے، کشمیری عوام تحریک انصاف کی راہ تک رہے ہیں۔

(جاری ہے)

اس موقع پر چیف آرگنائزر سیف اللہ خان نیازی نے کہا ہے کہ کشمیر ہمارے وجود کا حصہ، حق خودارادیت اور آزادی حقیقی منزل ہے، وزیراعظم کی قیادت میں تحریک انصاف ہر فورم ہر محاذ پر اہل کشمیر کی ترجمان ہے، آزادجموں و کشمیر کی تعمیر وترقی کا پورا خاکہ تیار کرچکے ہیں، کسی سیاسی یا انتخابی اتحاد کے بغیر انتخابی میدان میں اتریں گے اور اپنے بل پر حکومت قائم کریں گے، کارکن تیاری کریں، جلدآزاد جموں و کشمیر کیلئے انتخابی حکمت عملی کا اعلان کریں گے۔