پی آئی اے نے سعودی عرب جانے کیلئے کرایوں میں اضافہ کردیا

اضافہ سعودی حکومت کی طرف سے پروازوں میں کورونا کے باعث 25فیصد نشستیں خالی چھوڑنے کی وجہ سے کیا گیا ہے،ذرائع پی آئی اے

منگل 22 ستمبر 2020 13:53

پی آئی اے نے سعودی عرب جانے کیلئے کرایوں میں اضافہ کردیا

کراچی(اُردو پوائنٹ اخبارتازہ ترین - این این آئی۔ 22 ستمبر2020ء) قومی ایئرلائن(پی آئی ای) نے سعودی عرب جانے کیلئے کرایوں میں اضافہ کردیاہے،اضافہ سعودی حکومت کی طرف سے پروازوں میں کورونا کے باعث 25فیصد نشستیں خالی چھوڑنے کی وجہ سے کیا گیا ہے۔

(جاری ہے)

تفصیلات کے مطابق پی آئی اے نے سعودی عرب کیلئے کرایہ کو یک دم بڑا جمپ لگوا دیا،کراچی سے جدہ ، مدینہ یا دمام کیلئے یک طرفہ کرایہ ایک لاکھ27 ہزار روپے کردیا گیاجبکہ لاہور ، اسلام آباد یا پشاور سے جدہ اور مدینہ کا کرایہ ایک لاکھ33ہزار کردیا گیا، لاہور اسلام آباد یا پشاور سے ریاض اور دمام کا یک طرفہ کرایہ ایک لاکھ 31 ہزار کردیا گیا۔

اس سے پہلے پاکستان سے سعودی عرب کا کرایہ 84ہزار تھا۔پی آئی اے نے اپنے تمام ٹریول ایجنٹس کو نئے کرایے سے آگاہ کردیاہے۔نجی ایئرلائنز نے بھی سعودی عرب کے کرایوں میں من مانا اضافہ کردیا ہے۔ غیر ملکی ائیرلائن کی 1لاکھ 1 ہزار کی ٹکٹ اب مارکیٹ میں 1 لاکھ 40 ہزار تک فروخت کیے جانے لگی۔پی آئی اے کے مطابق کرایہ میں اضافہ سعودی حکومت کی طرف سے پروازوں میں کورونا کے باعث پچیس فیصد نشستیں خالی چھوڑنے کی وجہ سے کیا گیا ہے