Live Updates

پی ٹی آئی کا کھاتہ ختم ، نون لیگ کے ’ستارے‘ میں نئی روشنی آنے لگی

آنے والے دنوں میں پنجاب کی ایک لیڈر تو مریم نواز واضح ہے ، دوسرا لیڈر بننے کے آثار بلاول بھٹو زرداری کے ہو سکتے ہیں ، اب الیکشن ہوتے ہیں تو کوئی احمق ہی پی ٹی آئی کے ٹکٹ کے پیچھے دوڑے گا ، تجزیہ کار ایاز امیر کا کالم

ساجد علی ہفتہ 28 نومبر 2020 14:05

پی ٹی آئی کا کھاتہ ختم ، نون لیگ کے ’ستارے‘ میں نئی روشنی آنے لگی

اسلام آباد (اُردو پوائنٹ اخبارتازہ ترین ۔ 28 نومبر2020ء) مسلم لیگ ن کے قائد نوازشریف بطور وزیراعظم فارغ ہوئے تو الیکشن کے نتیجے میں عمران خان وزیراعظم بن گئے لیکن ان پچھلے دو سالوں میں سیاسی صورتحال بدل چکی ، خراب کارکردگی کی بنا پہ پی ٹی آئی اور عمران خان کی سیاسی ساکھ بُری طرح متاثر ہورہی ہے یا یوں کہیے کہ متاثر ہو چکی ہے ، ان خیالات کا اظہار تجزیہ کار ایاز امیر نے کیا۔

تفصیلات کے مطابق ’روزنامہ دنیا ‘ میں اپنے ایک کالم میں انہوں نے لکھا کہ ملک میں کل اگر الیکشن میں سیاسی جماعتیں مدِ مقابل ہوں تو پنجاب میں سیاسی خلا پیدا ہونے کی وجہ سے پیپلز پارٹی کیلئے ایک نیا موقع بن رہاہے ، پچھلے الیکشنوں میں تو پاکستان پیپلزپارٹی پِٹ کے رہ گئی تھی کیوں کہ مسلم لیگ ن کے مخالف عناصر پاکستان تحریک انصاف کی طرف چلے گئے تھے لیکن اب اگر الیکشن ہوتے ہیں تو کوئی احمق ہی پی ٹی آئی کے ٹکٹ کے پیچھے دوڑے گا کیوں کہ اب صورتحال ایسی بن چکی ہے کہ اگلے الیکشن میں امیدواروں کی کوشش ہوگی کہ اُن پہ پی ٹی آئی کا دھبہ کسی حوالے سے بھی نہ لگے اور جہاں تک عوام کا تعلق ہے تو مہنگائی کے مارے لوگ اپنا ووٹ کہیں بھی ڈالیں لیکن وہ پی ٹی آئی کے حق میں تو شاید ہی ڈالیں تاہم سارا پنجاب نون لیگ کا تو ہے نہیں ہے ، اس صورتحال میں ن لیگ کے مخالف عناصر پناہ اور عافیت کس چھتری تلے ڈھونڈیں گے؟۔

(جاری ہے)

ایاز امیر نے لکھا کہ پچھلے الیکشن کے وقت جو لوگ پیپلز پارٹی چھوڑ کے پی ٹی آئی کی طرف گئے تھے وہ اب پچھتا نہیں رہے ہوں گے؟ کیوں کہ وہ پی پی پی سے بھاگے تو اس لئے تھے کہ پی پی پی کا ٹکٹ شکست کی ضمانت بن چکا تھا لیکن اب تویوں لگتاہے کہ آئندہ الیکشنوں میں شکست کی مکمل ضمانت پی ٹی آئی کی ٹکٹ کی صورت میں ہوگی۔