Live Updates

بھارت سے ٹی ٹونٹی ورلڈ کپ 2021ء کی میزبانی چھننے کا امکان

بھارت میں کورونا وائرس کے بڑھتے کیسزمیگا ایونٹ کیلئے خطرہ، انٹرنیشنل کرکٹ کونسل کو میگا ایونٹ منتقل کرنے پر مجبور کیا جاسکتا ہے: وسیم خان

Zeeshan Mehtab ذیشان مہتاب منگل دسمبر 16:10

بھارت سے ٹی ٹونٹی ورلڈ کپ 2021ء کی میزبانی چھننے کا امکان
لاہور (اردو پوائنٹ تازہ ترین اخبار ۔ یکم دسمبر 2020ء ) پاکستان کرکٹ بورڈ (پی سی بی) کے چیف ایگزیکٹو وسیم خان کا خیال ہے کہ متحدہ عرب امارات (متحدہ عرب امارات) کے 2021ء ٹی ٹونٹی ورلڈ کپ کی میزبانی کا امکان ہے جو فی الحال اگلے سال اکتوبر میں بھارت میں ہونا ہے۔ کرکٹ باز یوٹیوب چینل پر انٹرویو دیتے ہوئے وسیم خان کا کہنا تھا کہ بھارت میں کورونا وائرس کے کیسز کی بڑھتی ہوئی تعداد میگا ایونٹ کے لیے خطرہ ہے جس کی وجہ سے انٹرنیشنل کرکٹ کونسل (آئی سی سی) کو میگا ایونٹ منتقل کرنے پر مجبور کیا جاسکتا ہے۔

وسیم خان کا کہنا تھا کہ بھارت میں ورلڈ ٹی ٹونٹی کے انعقاد کے بارے میں اب بھی کچھ غیر یقینی صورتحال موجود ہے، کوڈ 19 کی صورتحال کی وجہ سے ٹی ٹوونٹی ورلڈ کپ کو متحدہ عرب امارات بھی منتقل کیا جاسکتا ہے۔

(جاری ہے)

یاد رہے کہ انڈین پریمیر لیگ (آئی پی ایل) کا 13 واں سیزن بھی متحدہ عرب امارات میں ہوا کیونکہ حالیہ مہینوں میں ہندوستان میں کورونا وائرس کےکیسز میں بے تحاشہ اضافہ دیکھنے کو مل رہا ہے۔

وسیم خان نے آئی سی سی سے اس یقین دہانی کے مطالبہ کے اپنے موقف کا اعادہ بھی کیا کہ پاکستانی کھلاڑیوں کو ہندوستان میں 2021ء میں شیڈول ٹی 20 ورلڈ کپ میں شرکت کے لیے ویزا کے حصول میں کسی قسم کی پریشانی کا سامنا نہیں کرنا پڑے گا۔ ان کا کہنا تھا کہ احسان مانی نے انٹرنیشنل کرکٹ کونسل کو خط لکھ کر درخواست کی ہے کہ بھارت اور پاکستان کے مابین سیاسی تعلقات کو دیکھتے ہوئے اگر آئی سی سی اور بی سی سی آئی ہمیں ویزے جاری کیے جانے کے بارے میں تحریری یقین دہانی کرائے تو بہتر ہوگا۔

ایشیاء کپ 2020ء کے میزبان ، پاکستان کرکٹ بورڈ (پی سی بی) نے وبائی امراض کی وجہ سے ٹورنامنٹ ملتوی ہونے کے بعد سری لنکا کرکٹ (ایس ایل سی) کے ساتھ ٹورنامنٹ کے میزبانی کے حقوق کا تبادلہ کیا تھا۔ اس انتظام کے ذریعے سری لنکا اب جون 2021ء میں متوقع ایشیاء کپ کی میزبانی کرے گا جبکہ پی سی بی ایشیاء کپ 2022ء کی میزبانی کرے گا۔ وسیم کا کہنا تھا کہ اگلا ایشیاء کپ جون 2021ء میں سری لنکا میں منعقد کیا جائے گا اور 2022ء کے ایشیا کپ کے لئے ہمیں اب میزبانی کے حقوق مل گئے ہیں۔
کرونا وائرس کی دوسری لہر سے متعلق تازہ ترین معلومات