قانون کبھی جامد نہیں رہتا، وقت کے ساتھ ساتھ قانون میں تبدیلیاں رونما ہوتی ہیں :چیف جسٹس لاہور ہائی کورٹ

لاہور (اُردو پوائنٹ اخبارتازہ ترین - آن لائن۔ 26 فروری2021ء) چیف جسٹس لاہور ہائی کورٹ جسٹس محمد قاسم خان نے کہا ہے کہ عدلیہ کے اپنے ممبران کی متواتر تعلیم و تربیت انتہائی ضروری ہے،قانون کبھی جامد نہیں رہتا، وقت کے ساتھ ساتھ قانون میں بھی تبدیلیاں رونما ہوتی ہیں،وقت کے ساتھ چلنے کیلئے ججز کو سیکھانے کا عمل جاری رہتا ہے۔ان خیالات کااظہار چیف جسٹس لاہور ہائی کورٹ جسٹس محمد قاسم خان پنجاب جوڈیشل اکیڈمی کالا شاہ کاکو کیمپس کے دورہ کے موقع پر گفتگو کرتے ہوئے کیا ۔

جسٹس محمد قاسم خان نے کہاکہ جوڈیشل اکیڈمی کے قیام کا بنیادی مقصد بھی ججز کو سیکھنے کے بہترین مواقع فراہم کرنا تھا۔اکیڈمی کے انفراسٹرکچر میں ضروری ہوتا ہے کہ سیکھنے کیلئے آنے والوں کو ضرورت کی ہر چیز مہیا ہو،پنجاب جوڈیشل اکیڈمی کالا شاہ کاکو میں بھی ججز کے رہنے، سیکھنے سمیت ہر طرح کی سہولیات فراہم کی جارہی ہیں۔

(جاری ہے)

ہمارا پلان ہے کہ پنجاب جوڈیشل اکیڈمی آنے والے وقت میں ڈگری ایوارڈ کرنے والا بن کر سامنے آئے،پنجاب جوڈیشل اکیڈمی نہ صرف پورے پاکستان کے ججز کو ٹریننگ دے بلکہ قانونی ریسرچ پر بھی کام کرے۔

انہوںنے کہاکہ پنجاب جوڈیشل اکیڈمی میں ڈسٹرکٹ جوڈیشری میں آنے والے ججز کو مکمل پری سروس ٹریننگ دی جاتی ہے۔پروموشن حاصل کرنے والے ججز کے لئے بھی اکیڈمی میں تربیتی کورس کرنا لازمی ہوتا ہے۔کورونا وبا کے دوران بھی پنجاب جوڈیشل اکیڈمی نے اپنا کام جاری رکھا۔جدید ٹیکنالوجی سے استفادہ کرتے ہوئے ججز، وکلا اور سٹاف کو آن لائن ٹریننگ دی گئی،اگلے تین مہینوں میں اکیڈمی کے کالا شاہ کاکو کو کیمپس کو ہریالی کا گہوارہ بنایا جائے نہ صرف اکیڈمی کے اندر بلکہ اس کے ارد گرد بھی گرین ایریا بنایا جائے۔

انتظامیہ جلد سے جلد کالا شاہ کاکو کیمپس میں تمام سہولیات فراہم کرے۔ا نہوںنے کہاکہ ہم سی اینڈ ڈبلیو کے اب تک کے کام کو سراہتے ہیں،ہم سب مل کر انصاف کی اس تربیت گاہ کو جلد سے جلد مکمل کریں گے،یہاں سے تربیت مکمل کرنے والے جج فیلڈ میں جلد اور معیاری انصاف کی فراہمی میں بہترین کردار ادا کریں گے۔