اقتدار ہاتھ سے جاتا دکھائی دے تو دماغ کا الٹ جانا سمجھ آتا ہے ، مریم نواز

شاہد خاقان عباسی ، احسن اقبال ، مصدق ملک ، مرتضی جاوید عباسی اور خصوصاً مریم اورنگزیب پر فخر ہے جنہوں نے شیروں کی طرح ووٹ چوروں اور غنڈوں کا مقابلہ کیا ، نائب صدر ن لیگ کا پارلیمنٹ ہاؤس کے باہر کشیدگی پر تبصرہ

ساجد علی ہفتہ 6 مارچ 2021 13:10

اقتدار ہاتھ سے جاتا دکھائی دے تو دماغ کا الٹ جانا سمجھ آتا ہے ، مریم ..

اسلام آباد (اُردو پوائنٹ اخبارتازہ ترین ۔ 06 مارچ2021ء) مسلم لیگ ن کی نائب صدر مریم نواز نے کہا ہے کہ جب ہر جانب سے پے در پے ذلت آمیز شکست کا سامنا ہو اور اقتدار بھی ہاتھ سے جاتا دکھائی دے تو یوں دماغ کا الٹ جانا سمجھ آتا ہے۔ تفصیلات کے مطابق سماجی رابطوں کی ویب سائٹ ٹوئٹر پر جاری کیے گئے اپنے ایک بیان میں پارلیمنٹ ہاؤس کے باہر مسلم لیگ ن کے رہنماؤں کی میڈیا سے گفتگو کے دوران ہونے والی کشیدگی اور بدمزگی پر تبصرہ کرتے ہوئے انہوں نے کہا کہ شاہد خاقان عباسی ، احسن اقبال ، مصدق ملک ، مرتضی جاوید عباسی اور خصوصاً مریم اورنگزیب پر فخر ہے جنہوں نے شیروں کی طرح ووٹ چوروں اور غنڈوں کا مقابلہ کیا۔

جب ہر جانب سے، پے در پے ذلت آمیز شکست کا سامنا ہو اور اقتدار بھی ہاتھ سے جاتا دکھائی دے تو یوں دماغ کا الٹ جانا سمجھ آتا ہے۔ شاہد خاقان عباسی، احسن اقبال، مصدق ملک، مرتضی جاوید عباسی اور خصوصاً مریم اورنگزیب پر فخر ہے جنھوں نے شیروں کی طرح ووٹ چوروں اور غنڈوں کا مقابلہ کیا۔
— Maryam Nawaz Sharif (@MaryamNSharif) March 6, 2021

خیال رہے کہ پارلیمنٹ ہاوس کے باہر کشیدگی کے دوران پی ٹی آئی کارکنوں نے مسلم لیگ ن کے رہنماوں کو اس وقت گھیر لیا تھا ،جب مسلم لیگ (ن) کے رہنما سابق وزیر اعظم شاہد خاقان عباسی، ترجمان ن لیگ مریم اورنگزیب ، سابق وفاقی وزیر احسن اقبال اور دیگر اسلام آباد میں میڈیا سے گفتگو کررہے تھے کہ اس دوران تحریک انصاف کے کارکنان کی بڑی تعداد بھی ریڈ زون میں پہنچ گئی ، پی ٹی آئی ارکان نے عمران خان کی حمایت میں پلے کارڈ اٹھا رکھے تھے ، اس دوران پی ٹی آئی کارکنوں کا بینرز اٹھا کر اپوزیشن کے خلاف نعرے بازی کی۔

(جاری ہے)

بتایا گیا ہے کہ پی ٹی آئی کارکنان اور مسلم لیگ ن کے رہنماؤں کے درمیان ہاتھا پائی بھی ہوئی جس میں لیگی رہنما مصدق ملک اور شاہد خاقان عباسی بھی پی ٹی آئی کارکنان سے دست و گریباں ہوگئے ، اس دوران شدید تلخ کلامی بھی ہوئی ، پی ٹی آئی کارکنوں اور مصدق ملک کے ایک دوسرے کو دھکے بھی دیے ، جس کے بعد ن لیگی کارکنان نے اپنے رہنماؤں کو حفاظتی حصار میں لے لیا۔