پنجاب میں ملالہ کی تصویر پرنٹ کرنے پر 7ویں جماعت کی کتاب ضبط

گلبرگ میں او یو پی آفس پر چھاپہ ،کتاب کا پورا اسٹاک ضبط کرلیا گیا

منگل 13 جولائی 2021 22:01

پنجاب میں ملالہ کی تصویر پرنٹ کرنے پر 7ویں جماعت کی کتاب ضبط

لاہور(اُردو پوائنٹ اخبارتازہ ترین - آن لائن۔ 13 جولائی2021ء) پنجاب نصاب اور ٹیکسٹ بک بورڈ (پی سی ٹی بی) نے آکسفورڈ یونیورسٹی پریس (او یو پی) کی جانب سے شائع ہونے والی گریڈ 7 کے لیے جاری کردہ سوشل اسٹڈیز کی کتاب کو اہم شخصیات میں 1965 میں جنگ کے ہیرو میجر عزیز بھٹی شہید کی تصویر کے ساتھ ملالہ یوسف زئی کی تصویر پرنٹ کرنے پر ضبط کرلیا۔میڈیا رپورٹس کے مطابق کتاب کے صفحہ 33 پر چند اہم شخصیات کی تصاویر شائع کی گئیں جن میں قائد اعظم محمد علی جناح، قومی شاعر علامہ اقبال، سر سید احمد خان، لیاقت علی خان، عبدالستار ایدھی، بیگم رانا لیاقت علی خان، نشانِ حیدر وصول کرنے والے میجر عزیز بھٹی شہید اور ملالہ یوسف زئی شامل ہیں۔

ذرائع کا کہنا ہے کہ پی سی ٹی بی، پولیس اور دیگر ایجنسیاں شہر بھر کی دکانوں پر چھاپے مار رہی ہیں اور ملالہ یوسف زئی کی تصویر میجر عزیز بھٹی کے ساتھ شائع کرنے رپورٹ درج کرلی گئی ہے۔

(جاری ہے)

عہدیداروں کی ٹیم نے سب سے پہلے گلبرگ کے منی مارکیٹ میں واقع او یو پی آفس پر چھاپہ مارا اور کتاب کا پورا اسٹاک ضبط کرلیا۔انہوں نے پرنٹنگ پریس کو ایک خط بھی تھمایا جس میں کہا گیا تھا کہ اس کتاب کو این او سی جاری نہیں کیا گیا ہے۔

نام نہ ظاہر کرنے کی شرط پر ایک پبلشر نے میڈیا کو بتایا کہ یہ کتاب 2019 میں پی سی ٹی بی کو نظر ثانی اور این او سی جاری کرنے کے لیے پیش کی گئی تھی، بورڈ نے اس کے مواد کا جائزہ لینے کے بعد اسے اشاعت کے لیے منظور نہیں کیا تھا۔انہوں نے کہا کہ ’آکسفورڈ یونیورسٹی پریس نے این او سی جاری نہ کرنے کے باوجود کتاب شائع کی ہے‘۔انہوں نے کہا کہ پی سی ٹی بی کے عہدیداروں، پولیس اور دیگر ایجنسیوں نے ان کی دکان کا دورہ کیا، کتاب کے بارے میں پوچھا اور اسے ضبط کرنے کے احکامات کو پڑھ کر سنایا۔

پی سی ٹی بی کے منیجنگ ڈائریکٹر فاروق مظہر رپورٹ کے فائل کیے جانے تک رائے کے لیے دستیاب نہیں ہوسکے جبکہ اس کے ترجمان نے دعوٰی کیا کہ یہ کتاب اس لیے ضبط کی گئی کیونکہ اسے این او سی کے بغیر شائع کیا گیا تھا۔