’’پاکستان دنیا کا واحد ملک ہے جسے حکومت نے محنت کرکے زوال پذیر بنایا‘‘

لاہور(اُردو پوائنٹ، اخبار تازہ ترین، 25ستمبر 2021) پاکستان کوحکومت نے محنت کرکے زوال پذیر بنا دیا، نیوزی لینڈ ٹیم کی دورہ منسوخی پر حکومت نے کہا کہ بھارت نے کام دکھا دیا، بھارت اتنا طاقتور ہے تو حکومت کی خارجہ پالیسی کیا ہے، سینئر لیگی رہنما کا حکومت سے سوال۔ تفصیلات کے مطابق لاہور میں عدالت پیشی کے موقع پر میڈیا سے بات کرتے ہوئے رانا ثنا اللہ نے کہا کہ حکومت نے اپوزیشن کے خلاف انتقامی کارروائیاں شروع کی ہوئی ہیں، قائد حزب اختلاف شہباز شریف کے خلاف جھوٹے مقدمات بنائے گئے ہیں، حکومت اپوزیشن کے خلاف جعلی کارروائیوں میں مصروف ہے۔

رہنما (ن) لیگ کا کہنا تھا کہ حکومت کی جانب سے کہا گیا کہ نیوزی لینڈ کی ٹیم کے دورہ منسوخی میں بھارت نے کام دکھا دیا، بھارت آج بھی اتنا طاقتور ہے تو حکومت کی خارجہ پالیسی کیا ہے۔

(جاری ہے)

رانا ثنا اللہ کا کہنا تھا کہ پاکستان واحد ملک ہے جس کو حکومت نے محنت کرکے زوال پذیر بنا دیاہے۔ حکومت کی وجہ سے پاکستان تباہی کی طرف جارہاہے، عام شہری کے پاس بجلی کا بل ،خوراک اور ادویات کیلئے پیسے نہیں ہیں، عوام اور سیاسی جماعتوں کو حکومت کے خلاف میدان میں آنا چاہیے۔

میاں جاوید لطیف کے خلاف پارٹی ڈسپلن کی خلاف ورزی سے متعلق رانا ثنا اللہ نے کہا کہ پارٹی ڈسپلن ہر ایک پر لاگو ہوتا ہے،جاوید لطیف نے جو بات کی وہ سیاق سباق سے ہٹ کر تھی، جاوید لطیف پارٹی کا حصہ ہیں لیکن ان سے اس بات کا جواب لیا جائے گا، امید ہے جاوید لطیف پارٹی کو جواب جمع کرا دیں گے اور معاملہ حل ہوجائے گا۔عدالتوں کی حالت زار پر مسلم لیگ (ن) کے رہنما کا کہنا تھا کہ ججز کو باتھ روموں میں بٹھا دیا ہے ، کورٹس کو کسی مناسب جگہ پر بٹھایا جائے ، چیف جسٹس لاہور ہائیکورٹ کو عدالتوں کی حالت زار کا نوٹس لینا چاہیے،