Live Updates

وزیراعظم معائنہ کمیشن نے پنڈورا پیپرز کی باضابطہ انکوائری کا آغاز کر دیا

یہ پراسیس قانون کے مطابق مکمل کیا جائے گا اور ضرورت پڑنے پر اداروں کےذریعے قانون کی انفورسمنٹ کی جائے گی

سمیرا فقیرحسین ہفتہ 30 اکتوبر 2021 10:26

وزیراعظم معائنہ کمیشن نے پنڈورا پیپرز کی باضابطہ انکوائری کا آغاز ..

اسلام آباد (اُردو پوائنٹ تازہ ترین اخبار۔ 30 اکتوبر 2021ء) : وزیراعظم عمران خان کی معائنہ کمیشن نے پینڈورا پیپرز کی باضابطہ انکوائری کا آغاز کر دیا ہے۔ تفصیلات کے مطابق پینڈورا پیپرز کی باضابطہ تحقیقات کے سلسلے میں یہ طے کیا جا رہا ہے کہ کونسی کمپنیاں قانون کی خلا ف ورزی میں ملوث ، مالکان پبلک آفس ہولڈرز رہے ہوں۔ اس حوالے سے قومی اخبار روزنامہ جنگ میں شائع رپورٹ کے مطابق کمیشن نے مختلف ذ رائع سے معلو مات جمع کرنے کا عمل شروع کر دیا ہے، معلومات کے حصول کے لیے پینڈورا پیپرز کی معلومات جمع کرنے میں شریک صحافیوں اور آئی سی آئی جے سے آف شور کمپنیوں کے بارے میں معلومات لی جا رہی ہیں ۔

کمیشن کے جاری بیان میں کہا گیا ہے کہ پہلے مرحلے میں یہ طے کیا جا رہا ہے کہ کونسی کمپنیاں قانون کی خلا ف ورزی میں ملوث ہیں اور ان کمپنیوں کے مالکان مو جودہ دور میں یا سابق دور میں پبلک آفس ہولڈرز رہے ہوں۔

(جاری ہے)

جائزہ لیا جا رہا ہے کہ کیا منی لانڈرنگ یا ٹیکس چوری کی گئی ہے یا نہیں،پہلے فیز میں پچاس افراد یا کمپنیوں کا انتخاب کیا گیا ہے جن کے خلاف انکوائری ہوگی بعد ازاں اسے وسعت دی جائے گی۔

یہ پراسیس قانون کے مطابق مکمل کیا جائے گا اور جب بھی ضرورت ہوگی تو قانون نافذ کرنیوالے اداروں کےذریعے قانون کی انفورسمنٹ کی جائے گی ،کمیشن کے مطابق ملوث افراد یا کمپنیوں کو موقع دیا جائے گا کہ وہ تحریری طور پر اپنا مؤقف پیش کریں اور اپنی آف شور کمپنی کے بارے میں وضاحت کریں. وزیر اعظم کمیشن نے عوام کو دعوت دی ہے کہ وہ شفافیت کو یقینی بنانے کے لیے تحقیقات کے عمل میں کمیشن کی مدد کریں ۔

خیال رہے کہ قبل ازیں پاکستان نے پینڈورا لیکس سے متعلق آئی سی آئی جے سےمعلومات فراہم کرنے کی درخواست کی تھی ۔ وزیراعظم معائنہ کمیشن نے انٹرنیشنل کنسورشیم آف انویسٹیگیٹو جرنلسٹس (آئی سی آئی جے) سے پینڈورا لیکس سے متعلق معلومات فراہم کرنے کی درخواست کی تھی۔ وزیراعظم معائنہ کمیشن کی جانب سے جاری کردہ اعلامیہ میں کہا گیا کہ درخواست میں پاکستانیوں کی آف شور کمپنیز سے متعلق معلومات کی فراہمی شامل ہے۔ کمیشن کے مطابق تمام تحقیقات حقائق پر مبنی ہوں گی کوئی اور ادارہ بھی معلومات دینا چاہے تو دے سکتا ہے۔ اعلامیہ میں کہا گیا کمیشن احتساب،شفافیت اورگڈگورننس پریقین رکھتا ہے اور تمام تحقیقات حقائق پر مبنی ہوں گی۔