تجاوزات قائم کرنے والوں کے خلاف قانونی کارروائی عمل میں لائی جائے گی ،سی سی پی او پشاور

جمعرات 25 نومبر 2021 15:34

پشاور(اُردو پوائنٹ اخبارتازہ ترین - اے پی پی۔ 25 نومبر2021ء) سی سی پی او پشاور عباس احسن کی ہدایت پرچیف ٹریفک آفیسر عباس مجید خان مروت کی نگرانی میں سٹی ٹریفک پولیس پشاور کے اہلکاروں نے باچا خان چوک،حیات آباد،خوشحال بازاراور نمک منڈی روڈ پر تجاوزات مافیاکے خلاف کاروائیوں کے دوران 619افرادکوگرفتارکرکے بھاری جرمانہ عائدکیا گیا۔اسی طرح کینٹ سیکٹر میں بلور پلازے کے سامنے خوشحال بازار اور نمک منڈی میں نو پارکنگ زون میں موٹر سائیکلیں کھڑی کرنے پر 155 موٹر سائیکل مالکان پر جرمانے عائد کئے گئے ہیں۔

چیف ٹریفک آفیسر عباس مجید خان مروت نے کہا ہے کہ سٹی ٹریفک پولیس پشاور قانونی تقاضوں کو پورا کرتے ہوئے تجاوزات مافیا کو پہلے نوٹسز جاری کرتی ہے جبکہ اس کے بعد آپریشن کر کے تجاوزات قائم کرنے کے مرتکب افراد کو حراست جبکہ سامان کو قبضے میں کے کر ٹرمینل منتقل کردیا جاتا ہے تاکہ مالکان پر جرمانے عائد کئے جائیں۔

(جاری ہے)

انہوں نے کہا کہ تجاوزات مافیا شہر کی خوبصورتی کا خاص خیال رکھتے ہوئے اپنے حدود سے تجاوز نہ کریں اور شہریوں کیلئے کسی قسم کے مشکلات پیدا کرنے سے گریز کریں۔

انہوں نے کہا کہ تجاوزات کی وجہ سے شہر کی خوبصورتی متاثر ہوتی ہے جو کسی صورت قابل قبول نہیں۔ عباس مجید خان مروت نے کہا کہ تجاوزات قائم کرنے کے مرتکب افراد کے خلاف سخت سے سخت قانونی کارروائی عمل میں لائی جائے گی اور کسی کے ساتھ کوئی نرمی نہیں برتی جائے گی ۔