گھر بنانا بھی خواب بن گیا، پٹرولیم ڈیلرز کے بعد بلڈر اور ڈویلپرز ایسوسی ایشن نے ہڑتال کا اعلان کر دیا

ریت، بجری، سیمنٹ ، اینٹوں اور سرئیے سمیت تمام بلڈنگ میٹریل کی قیمتیں آسمان سے باتیں کرنے لگیں

مقدس فاروق اعوان جمعہ 26 نومبر 2021 12:34

گھر بنانا بھی خواب بن گیا، پٹرولیم ڈیلرز کے بعد بلڈر اور ڈویلپرز ایسوسی ..

کراچی (اُردوپوائنٹ اخبارتازہ ترین۔ 26 نومبر2021ء) پٹرولیم ڈیلرز کے بعد بلڈر اور ڈویلپرز ایسوسی ایشن نے ہڑتال کا اعلان کر دیا۔تفصیلات کے مطابق ملک میں کھانے پینے کی اشیاء کے ساتھ ساتھ بلڈنگ میٹریل مہنگا ہونے سے گھر بنانا بھی خواب بن گیا۔ریت، بجری، سیمنٹ ، اینٹوں اور سرئیے سمیت تمام بلڈنگ میٹریل کی قیمتیں آسمان سے باتیں کرنے لگی ہیں۔پٹرولیم ڈیلرز نے گذشتہ روز کاروبار بند کیا تو آج بلڈرز اور ڈویلپرز ایسوسی ایشن نے بھی شٹر گرا دئیے۔

کراچی میں تمام پراجیکٹس پر کام بند کر دیا گیا۔سابق چئیرمین حسن بخشی نے 92 نیوز کے پروگرام ہارڈ ٹاک پاکستان میں گفتگو کرتے ہوئے کہا کہ تعمیراتی سامان بہت مہنگا ہو چکا۔ایسے کاروبار نہیں چل سکتے۔کراچی میں بلڈنگ مارکیٹ متاثر ہے۔

(جاری ہے)

سریے کی قیمت پر ریگولیٹری ڈیوٹی ہٹانا چاہئیے۔خیال رہے کہ اس سے قبل پٹرولیم ڈیلرز کی ہڑتال نے عوام کا جینا محال کیے رکھا۔

پٹرولیم ڈیلرز ایسوسی ایشن نے اپنے مارجن میں اضافہ کرنے کا مطالبہ منظور نہ کیے جانے پر جمعرات کے روز ملک گیر ہڑتال کر دی تھی۔گذشتہ شب پٹرولیم ڈیلرز ایسوسی ایشن اور پٹرولیم ڈویژن کے درمیان معاملات طے پا گئے۔ حکومت کیساتھ معاملات طےپانے کے بعد پٹرولیم ڈیلرز ایسوسی ایشن نے ملک گیر ہڑتال ختم کرنے کا اعلان کیا ۔ہڑتال ختم کرنے کے اعلان کے فوری بعد ملک بھر کے پٹرول پمپس کھلنا شروع ہو گئے۔

میڈیا رپورٹس کے مطابق پٹرولیم ڈیلرز ایسوسی ایشن اور پٹرولیم ڈویژن کے مابین مذاکرات کے بعد پٹرولیم ڈویژن ‏نے فی لیٹر پیٹرول پر مارجن میں99 پیسے اضافے پر رضامندی کا اظہار کیا ہے۔یٹرولیم ڈویژن نے 6 ماہ بعد ڈیلرز مارجن کاجائزہ لینےکی یقین دہانی بھی کرواتے ہوئے کہا ہے کہ ڈیلرز مارجن ‏اضافہ 4.90 روپے فی لیٹر کیا جائےگا۔