Live Updates

کورونا کی نئی قسم نے پاکستان ویسٹ انڈیز سیریز خطرے میں ڈال دی

جنوبی افریقی باشندوں کی پاکستان آمد پر پابندی عائد ہونے کے باعث سیریز کیلئے براڈ کاسٹرز عملے کے دیگر آپشنز پر غور ،جنوبی افریقی براڈ کاسٹرز کو قرنطینہ کروانیکا آپشن بھی زیرغور

Zeeshan Mehtab ذیشان مہتاب پیر 29 نومبر 2021 17:15

کورونا کی نئی قسم نے پاکستان ویسٹ انڈیز سیریز خطرے میں ڈال دی
لاہور (اردو پوائنٹ تازہ ترین اخبار ۔ 29 نومبر 2021ء ) پاکستان کرکٹ بورڈ (پی سی بی) نے آج ایک اہم میٹنگ طلب کی ہے جس میں پروڈکشن کمپنی کے عملے کے سفری منصوبے پر تبادلہ خیال کیا جائے گا جو ویسٹ انڈیز کے دورہ پاکستان اور پاکستان سپر لیگ (پی ایس ایل) سیزن 7 میں کام کرے گا۔ عملے کے ارکان کی ایک بڑی تعداد کا تعلق جنوبی افریقہ، نائیجیریا اور افریقہ کے دیگر حصوں سے ہے جہاں گزشتہ ہفتے COVID-19 کی تازہ ترین شکل 'Omicron' دریافت ہوئی تھی جس کے بعد پوری دنیا کی جانب سے ان علاقوں پر سفری پابندیاں عائد کر دی گئی ہیں۔

ذرائع نے بتایا کہ پی سی بی نے آج شام ایک میٹنگ بلائی ہے جس میں آئندہ دو بڑے ایونٹس کے لیے افریقی عملے کو پاکستان لانے کے ممکنہ آپشنز پر غور کیا جائے گا۔ پاکستان نے افریقی خطے خصوصاً جنوبی افریقہ، موزمبیق، بوٹسوانا اور نمیبیا سے آنے والے مسافروں پر سفری پابندیاں عائد کر دی ہیں۔

(جاری ہے)

پی سی بی آئندہ ماہ کراچی میں ویسٹ انڈیز کی تین ٹی ٹونٹی اور اتنے ہی ون ڈے میچز کی میزبانی کرے گا۔

مہمان ٹیم 9 دسمبر کو کراچی پہنچے گی۔ یہاں یہ بات قابل ذکر ہے کہ اومیکرون کی آمد کے بعد افریقہ میں کھیلوں کے مقابلوں کا سلسلہ یا تو ملتوی یا منسوخ ہو گیا تھا۔ ان ایونٹس میں زمبابوے میں آئی سی سی ویمنز ورلڈ کپ کوالیفائرز، جنوبی افریقہ میں جنوبی افریقہ بمقابلہ نیدرلینڈز ون ڈے سیریز، جنوبی افریقہ میں انٹرنیشنل ٹینس ایونٹ اور یونائیٹڈ رگبی چیمپئن شپ شامل ہیں۔
Live پی ایس ایل 7 سے متعلق تازہ ترین معلومات
>