Live Updates

پی ٹی آئی نے گھوٹکی سے کراچی مارچ کے سلسلے میں پارٹی رہنماوں اور سیاسی شخصیات سے رابطے تیز کردیئے

وفاقی وزیرعلی زیدی کی سابق وزیر اعلیٰ سندھ غوث علی شاہ، سابق صوبائی وزیر آغا تیمور اور جی ڈی اے رہنما عارف جتوئی سے ملاقاتیں

پیر 17 جنوری 2022 20:52

پی ٹی آئی نے گھوٹکی سے کراچی مارچ کے سلسلے میں پارٹی رہنماوں اور سیاسی ..

کراچی(اُردو پوائنٹ اخبارتازہ ترین - این این آئی۔ 17 جنوری2022ء) پاکستان تحریک انصاف سندھ کے صدر و وفاقی وزیر علی زیدی نے 27فروری کو گھوٹکی سے کراچی مارچ کے سلسلے میں پارٹی رہنماوں اور سیاسی شخصیات سے رابطے تیز کردیے ۔ وفاقی وزیر علی زید ی نے پی ٹی آئی رہنماوں سابق وزیر اعلیٰ سندھ غوث علی شاہ، سابق صوبائی وزیر آغا تیمور اور جی ڈی اے رہنما غلام مصطفی جتوئی سے کراچی میں ملاقاتیں کیں۔

وفاقی وزیر علی زیدی نے 27فرور ی کو گھوٹکی سے کراچی مارچ کے حوالے سے رہنماوں کو تفصیلات سے آگاہ کیا۔ پی ٹی آئی سندھ کے صدر و وفاقی وزیر علی زیدی کا کہنا تھا کہ 27فروری کا مارچ سندھ کے نا اہل حکمرانوں کے ایوانوں میں ہل چل مچا دے گا۔ سندھ حکومت کے کالے بلدیاتی قانون کے خاتمے تک یہ تحریک جاری رہے گی۔

(جاری ہے)

اس کالے قانون کے خاتمے کے لئے ہر آپشن استعمال کریں گے۔

اب وقت آگیا ہے کہ سندھ کے عوام زرداری مافیا کے خلاف اپنے گھروں سے نکلیں۔ انہوں نے مزید کہا کہ زرداری مافیا نے سندھ کے عوام کا جینا دوبھر کردیا ہے، اب ہم بھی سندھ کے حکمرانوں کو سکھ کا سانس نہیں لینے دیں گے۔ ان کا بنایا ہوا بلدیات کا کالا قانون انہی کو لے ڈوبے گا۔ 27فروری کو سندھ کے عوام بڑی تعداد میں گھوٹکی سے کراچی مارچ میں شریک ہونگے۔

سندھ سے زرداری مافیا کے خاتمے تک سندھ کی ترقی ممکن نہیں ہے۔ درین اثنا، پی ٹی آئی سندھ کے صدر و وفاقی وزیر علی زیدی سے ان کے دفتر میں کراچی کی تاجر برادری کے وفد نے ملاقات کی،ملاقات میں تاجر رہنما زبیرموتی والا، جاوید بلوانی، فیصل معیز، ادریس گی گی ، سلیم پاریکھ، عامر لاری، نثار احمد ، عبد الرشید اور سجاد وزیر، پی ٹی آئی اراکین سندھ اسمبلی ریاض حیدر، ارسلان تاج اور سدرہ عمران موجود تھے۔

وفاقی وزیر علی زیدی نے تاجر برادری کے مسائل سنے اور ان کے حل کے لئے اقدامات کرنے کی یقین دہانی بھی کروائی۔ علی زیدی نے کراچی کی ترقی میں تاجر برادری کے کردار کو بھی سراہا۔ علی زیدی کا کہنا تھا کہ کراچی کی تاجر برادری ملک کی ریڑھ کی ہدی کی حیثیت رکھتی ہے۔ کراچی ملک کا معاشی حب تاجر برادری کی وجہ سے کہلاتا ہے۔ ملک کو بحرانوں سے نکالنے میں کراچی کی تاجر برادری نے ہمیشہ اپنا کردار ادا کیا ہے ۔ وزیر اعظم عمران خان بھی کراچی کی تاجر برادری کو قدر کی نگاہ سے دیکھتے ہیں۔ انہوں نے مزید کہا کہ تاجر برادری کے مسائل کو وزیر اعظم عمران خان کے سامنے رکھوں گا، ان کے مسائل کا حل ہماری اولین ترجیحات میں شامل ہے۔