Live Updates

عمران خان نے چار سال قوم کو سبز باغ دکھائے مگر عملی طور پر کچھ نہ کیا،علی موسیٰ گیلانی

اس دور میں اسٹیبلشمنٹ کا سیاست میں کردار نہیں رہ گیا،عوام تک سچ پہنچایا تو انہوں نے جتوایا،ضمنی الیکشن میں ملتان سے کامیاب امیدوار کا اردو پوائنٹ کو انٹرویو

عبدالجبار بدھ 19 اکتوبر 2022 14:30

عمران خان نے چار سال قوم کو سبز باغ دکھائے مگر عملی طور پر کچھ نہ کیا،علی ..

ملتان (اردوپوائنٹ،اخبارتازہ ترین ۔ 19 اکتوبر 2022ء) قومی اسمبلی کے حلقے این اے 157 کے ضمنی الیکشن میں کامیاب ہونے والے امیدوار اور پیپلز پارٹی کے رہنما علی موسٰی گیلانی کا کہنا ہے کہ عوام تک سچ پہنچا دیا جائے تو وہ ووٹ ڈالنے گھروں سے نکل آتے ہیں۔عمران خان نے قوم سے جھوٹ بولا،چار سال پاکستانیوں کو سبز باغ دکھائے اور عملی طور پر کچھ نہیں کیا۔

علی موسٰی گیلانی نے اردو پوائنٹ کو انٹرویو دیتے ہوئے کہا کہ جنہوں نے ملک کی ترقی کیلئے کام کرنا ہوتا ہے ان کیلئے چار سال کافی ہیں۔ووٹ لینے کے سوال پر انکا کہنا تھا کہ ہم نے جس حلقے میں پل بنایا تھا اس حلقے سے تو ہم الیکشن لڑتے ہی نہیں۔ہم نے ملتان شہر میں ترقیاتی کام کرائے ہسپتال بنائے اور انٹرنیشنل ائیر پورٹ بھی بنایا۔

(جاری ہے)

ہمیں ووٹ نہ ملیں تو پھر بھی ترقیاتی کام کریں گے۔

انکا کہنا تھا کہ ہم نے بیانیہ بنایا کہ اس ملک کو نفرت سے پاک رکھنا ہے۔مجھے 2018 میں بھی پتہ تھا کہ اس حلقے کا پاپولر ووٹ میرے ساتھ ہے۔سڑک بنانے کا وعدہ لیکر لوگوں سے ووٹ نہیں لیا،لوگوں نے مجھ سے سڑکیں نہیں مانگیں بلکہ انہوں نے مجھے اپنی آواز بنایا ہے۔ علی موسٰی گیلانی نے کہا کہ مجھے دیہات تک پینے کا صاف پانی پہنچانا ہے،لوگ سمجھتے ہیں کہ عمران خان کچھ کرے یا نہ کرے وہ سچا آدمی ہے،میں کہتا ہوں کہ وہ جھوٹا اور مکار آدمی ہے۔

پیپلز پارٹی نے عام طبقے کی خوشحالی اور حقوق کیلئے عملی اقدامات اٹھائے۔ اردو پوائنٹ کے ایک سوال پر انکا کہنا تھا کہ اب اس دور میں اسٹیبلشمنٹ کا سیاست میں کردار نہیں رہ گیا،علی موسٰی گیلانی نے مزید کہا کہ میں کیوں اینٹی اسٹیبلشمنٹ بیانیے پر چلوں۔یوسف رضا گیلانی نے مجھ سے کہا تھا کہ اگر میں نے ہی حلقے میں جانا ہے تو آپ کیا کر رہے ہو؟ یاد رہے کہ 16 اکتوبر کے ضمنی الیکشن میں علی موسیٰ گیلانی نے پی ٹی آئی کی مہربانو قریشی کو این اے 157 کی نشست پر شکست دی،قومی اسمبلی کے حلقے این اے 157 ملتان کے ضمنی انتخاب میں تمام 264 پولنگ اسٹیشنز کا غیر سرکاری غیر حتمی نتیجہ سامنے آیا تھا جس کے مطابق د علی موسیٰ گیلانی 79743 ووٹ لے کر کامیاب ہوئے،تحریک انصاف کی مہر بانو قریشی نے 59993 ووٹ حاصل کیے۔