پاکستان اور چین کی دوستی میں خلل ڈالنے کی کوئی کوشش کامیاب نہیں ہو سکتی،وزیر اعظم

سی پیک منصوبوں سے پاکستان سمیت خطے میں سرمایہ کاری کو فروغ ملے گا،شہباز شریف کا چائنہ گلوبل ٹیلی ویژن نیٹ ورک کو انٹرویو

عبدالجبار ہفتہ 5 نومبر 2022 14:04

پاکستان اور چین کی دوستی میں خلل ڈالنے کی کوئی کوشش کامیاب نہیں ہو سکتی،وزیر ..

اسلام آباد (اُردو پوائنٹ،اخبارتازہ ترین ۔ 05 نومبر2022ء) وزیر اعظم شہباز شریف کا کہنا ہے کہ پاکستان اور چین سی پیک اور باہمی سرمایہ کاری کے منصوبوں کو فروغ دیں گے۔پاکستان اور چین کی دوستی میں خلل ڈالنے کی کوئی کوشش کامیاب نہیں ہوسکتی۔ وزیر اعظم شہباز شریف نے چائنہ گلوبل ٹیلی ویژن نیٹ ورک کو انٹر ویو دیتے ہوئے کہا کہ چینی قیادت سے سرمایہ کاری،سی پیک اور جیو پولیٹکل اسٹریٹجی پر مفید مذاکرات ہوئے۔

سی پیک اور سرمایہ کاری کے منصوبوں کو فروغ دیں گے جس سے پاکستان ہی نہیں بلکہ پورے خطے میں خوشحالی لائی جا سکتی ہے۔ہماری دوستی اور باہمی اعتماد مضبوط تعلقات کا عکاس ہے،چین اس خطے میں پیچھے رہنے کا متحمل نہیں ہو سکتا۔ انکا کہنا تھا کہ چین کا بیانیہ ترقی،خوشحالی اور امن ہے،عسکری لحاظ سے چین بہت مضبوط اور محتاط ہے۔

(جاری ہے)

جو چین کی راہ میں روڑے اٹکانا چاہتے ہیں ان کی پالیسیاں غلط ہیں،دنوں ممالک ہاہمی مشاورت کے عمل کو تیز کریں گے،جبکہ چین اور پاکستان کی دوستی ناقابل تسخیر ہے۔

قبل ازیں زیر اعظم شہباز شریف اور نواز شریف کے درمیان ٹیلیفونک رابطہ ہوا ہے،دونوں رہنماؤں نے عمران خان کے اداروں سے متعلق بیانات پر تبادلہ خیال کیا۔ دنیا نیوز نے ذرائع کا حوالہ دیتے ہوئے رپورٹ کیا کہ ٹیلیفونک رابطے میں نواز شریف نے شہباز شریف کو عمران خان کیخلاف قانونی کارروائی کی ہدایت کی اور کہا کہ آئی ایس پی آر کے بیان کی بنیاد پر حکومت تمام قانونی تقاضے پورے کرے۔

ریاستی اداروں کیخلاف عمران خان نفرت پھیلا رہا ہے،یہ شخص فوج اور عوام کو آمنے سامنے لا کر خونی انقلاب کی باتیں کر رہا ہے۔ وزیر اعظم شہباز شریف نے کہا کہ عمران خان سکیورٹی رسک بن گئے ہیں،ان کیخلاف کارروائی کر رہے ہیں،جبکہ وزیر اعظم نے آج لاہور میں اعلٰی سطح اجلاس طلب کر لیا جس میں عمران خان کے بیانات کی روشنی میں آئندہ کا لائحہ عمل مرتب کیا جائے گا۔