ملک میں لوڈشیڈنگ کی سب سے بڑی وجہ موبائل فون کے چارجر ہیں، جاوید چوہدری کا انوکھا دعویٰ

پاکستان میں کروڑوں لوگ موبائل چارج کرنے کے بعد چارجر کو ساکٹ سے نہیں نکالتے یا بٹن بند نہیں کرتے، اگرچہ فون منسلک نہ ہو، تب بھی وہ چارجر بجلی "کھینچ" رہا ہوتا ہے؛ کالم نگار اور اینکر پرسن کی گفتگو

ساجد علی اتوار 3 مئی 2026 21:41

ملک میں لوڈشیڈنگ کی سب سے بڑی وجہ موبائل فون کے چارجر ہیں، جاوید چوہدری ..

اسلام آباد (اُردو پوائنٹ اخبارتازہ ترین۔ 03 مئی 2026ء) معروف کالم نگار اور اینکر پرسن جاوید چوہدری نے اپنے حالیہ پوڈ کاسٹ میں ملک میں جاری بجلی کے بحران اور لوڈشیڈنگ کی ایک ایسی وجہ بیان کی ہے جس نے سوشل میڈیا پر نئی بحث چھیڑ دی، جاوید چوہدری کا دعویٰ ہے کہ پاکستان میں لوڈشیڈنگ کی سب سے بڑی وجہ موبائل فون چارجرز کا غیر ضروری استعمال ہے۔ تفصیلات کے مطابق اپنے تازہ ترین پوڈ کاسٹ میں ملکی معیشت اور توانائی کے بحران پر گفتگو کرتے ہوئے جاوید چوہدری نے ایک ایسا مؤقف اپنایا جس نے سب کو حیران کردیا، ان کا کہنا ہے کہ اگر پاکستانی قوم صرف اپنے موبائل چارجرز کا درست استعمال شروع کر دے تو لوڈشیڈنگ کا بڑا حصہ ختم کیا جا سکتا ہے۔

جاوید چوہدری نے اپنے دعوے کے حق میں منطق پیش کی کہ پاکستان میں کروڑوں لوگ موبائل چارج کرنے کے بعد چارجر کو ساکٹ سے نہیں نکالتے یا بٹن بند نہیں کرتے، اگرچہ فون منسلک نہ ہو، تب بھی وہ چارجر بجلی "کھینچ" رہا ہوتا ہے، اگر ملک کے 18 کروڑ موبائل فونز کے چارجرز ہر وقت سوئچ آن رہیں، تو یہ مل کر کئی میگا واٹ بجلی ضائع کرتے ہیں، جو کہ کئی چھوٹے پاور پلانٹس کی پیداوار کے برابر ہے، ہم انفرادی طور پر بجلی ضائع کرتے ہیں اور پھر حکومت کو لوڈشیڈنگ کا ذمہ دار ٹھہراتے ہیں۔

(جاری ہے)

لوڈشیڈنگ کی سب سے بڑی وجہ موبائل فون چارجر ہیں۔ جاوید چودھری pic.twitter.com/Ffh5xUil0e
— Ghazanfar Abbas (@ghazanfarabbass) May 3, 2026

اس سلسلے میں ماہرینِ توانائی کہتے ہیں کہ جدید چارجرز فون ہٹانے کے بعد بجلی کا استعمال تقریباً ختم کر دیتے ہیں، اگر 10 کروڑ چارجرز بھی مسلسل آن رہیں، تب بھی ان کا مجموعی لوڈ چند میگا واٹ سے زیادہ نہیں بنتا، جبکہ پاکستان میں لوڈشیڈنگ کا شارٹ فال عموماً 5 ہزار سے 7 ہزار میگا واٹ تک ہوتا ہے، لوڈشیڈنگ کی اصل وجوہات میں آئی پی پیز کے معاہدے، لائن لاسز، بجلی چوری اور پرانا ٹرانسمیشن نظام شامل ہیں۔