قمر جاوید باجوہ کا دور تاریخ میں یاد رکھاجائے گا ، لوگوں کے دلوں میں بھی یادرہے گا،چودھری پرویزالہی

لاہور(اُردو پوائنٹ اخبارتازہ ترین - آن لائن۔ 29 نومبر2022ء) وزیراعلیٰ پنجاب چودھری پرویزالٰہی نے کہا ہے کہ سابق آرمی چیف قمر جاوید باجوہ کا دور تاریخ میں یاد رکھاجائے گا اور لوگوں کے دلوں میں بھی یادرہے گا،آپریشن ردالفساد میں سابق آرمی چیف قمر جاوید باجوہ کے شاندار کردارکی دنیا معترف ہے ،ملک سے دہشت گردی کے خاتمے کا کریڈٹ قمرجاوید باجوہ کو جاتا ہے، نئے آرمی چیف سید عاصم منیر کو بھی مبارکباد پیش کرتا ہوں، ہماری سب کی دعائیں نئے آرمی چیف کے ساتھ ہیں، اللہ تعالیٰ کی مددسے نئے آرمی چیف سید عاصم منیر پاکستان پرکوئی آنچ نہیں آنے دیں گے۔

اپنے ایک ویڈیو پیغام میں چودھری پرویزالٰہی نے کہا سوات، قبائلی علاقوں، وزیرستان میں دہشت گردی کے خاتمے کیلئے قمر جاوید باجوہ نے بہت محنت کی اوردہشت گردوں کو ختم کیا۔

(جاری ہے)

الحمداللہ آج خیبرپختونخواہ سمیت تمام علاقوں میں امن ہے اورلوگ پرسکون ہیں۔چودھری پرویزالٰہی نے کہا جب زلزلہ آیا تواس وقت بھی سابق آرمی چیف قمر جاوید باجوہ کی قیادت میں پاک فوج نے بہت کام کیا۔

سیلاب میں بھی آرمی پنجاب کے متاثرہ علاقوں سمیت ہر جگہ بروقت پہنچی۔ سندھ میں سیلاب کے دوران پاک فوج کے علاوہ کسی نے کام نہیں کیا۔ خیبر پختونخوامیں بدترین سیلاب آیااورقمر جاوید باجوہ خود وہاں پہنچے۔ انہوں نے کہا جنرل (ر) قمر جاوید باجوہ کی سماجی و دینی خدمات بے شمار ہیں۔ سعودی عرب نے دنیا کی سب بڑی تبلیغی جماعت پر غلط فہمی کی بناپرپابندی لگا دی تو سابق آرمی چیف قمر جاویدباجوہ نے پابندی ہٹوانے میں لیڈنگ کردار ادا کیا۔

تبلغی جماعت کے اجتماعات میں قمر جاویدباجوہ کی درازی عمر اورپالیسیوں کے تسلسل کیلئے سب سے زیادہ دعائیں کی گئیں۔ قمر جاوید باجوہ کا کرداردین کیلئے بھی اچھاہے،ملک کیلئے بھی اچھاہے اورآئندہ آنے والی نسلوں کے بھی اچھا ہے۔ میں سمجھتا ہوں کہ لوگ آتے جاتے ہیں لیکن ان کے کام ہمیشہ یاد رہتے ہیں۔ قمر جاوید باجوہ نے ملک کی حفاظت،سلامتی اوربہتری کیلئے جتنے کام کیے وہ رہتی دنیا تک لوگ یاد رکھیں گے۔

چودھری پرویزالٰہی نے کہا میں نئے آرمی چیف سید عاصم منیر کو بھی مبارکباد پیش کرتا ہوں۔ ہمیں بہتری کی امید ہے کہ جنرل سیدعاصم منیر کا بہت تجربہ ہے ا ورانہوں نے بہت کام کیا ہے۔ مجھے بھی موقع ملا تھا 8،10ماہ کام کرنے کا ان کے ساتھ،انشائ اللہ جنرل سید عاصم منیر بہترین سپہ سالار ثابت ہوں گے۔ ہماری سب کی دعائیں نئے آرمی چیف کے ساتھ ہیں۔

ہندوستان یہ نہ سمجھے کہ ہم لاوارث ہوگئے ہیں،یہ کبھی نہیں ہوسکتا۔چودھری پرویزالٰہی نے کہا پاک فوج دنیا کا بہترین ادارہ ہے اورپورا ایک نظام موجود ہے۔ دنیا کی سب سے بہترین فوج پاکستان کی فوج ہے۔ پاک فوج کی ہر جگہ پرنظرہوتی ہے،خصوصاًفارن پالیسی اوردیگر امور بھی ان کی نظر میں ہوتے ہیں۔ اللہ تعالیٰ کی مددسے انشائ اللہ نئے آرمی چیف سید عاصم منیر پاکستان پرکوئی آنچ نہیں آنے دیں گے۔